Ey Gönül Gir Râh-ı Aşka Mâsivâdan Kıl Ferâğ

22 Ağustos 2020 tarihinde yayınlanmıştır.

NUTK-İ ŞERÎF

Ey gönül gir râh-ı 'aşka mâsivâdan kıl ferâğ

Kabr içinde haşr olagör yüzün olsun bunda ağ

Bir vücûd-i bâķîsin ki 'âlemi sensin muhît

Elde tut misbâh-ı 'aşkı anda yanar bu çerâğ

Kenz-i esrâr-ı Hudâ'sın sırr-ı Hakk'ın mahremi

Cümle senden yaradıldı hûr u gılmân kasr u bâğ

Kâmil insân olmağa bil nefsini bilmek gerek

Zâhidâ sen bilmedin ki ne imiş bu nefs-i zâğ

Hem zebûn oldun elinde her ne dedi işledin

Ric'at eyle kim cihân milki sana olmaz otağ

Hubb-i dünyâ başı oldu her hatîanın gözüm

Koma kalbe zerre olur ise olur ulu dağ

Görmedin mi bu cihâna hep gelenler gitdiler

Bir gün olur kim seni de iletirler bî- ayağ

Geç 'anâsırdan cihetden gönlüne gel gönlüne

Terk-i dünyâ eyle tâ kim hasta gönlün ola sağ

Ey Hayâtî Vehbî sungil câm-ı 'aşkından bize

Sırr-ı esrâr-ı tarîkat sende hatm oldu bu çağ

Ey Hayâlî Şems çün kim eyledin 'aşķa heves

Meclis-i rindâna gel kaldır ayağ kaldır ayağ

Leblebici Baba

Kuddise Sırruh