Ey Gönül Tâvûslayın Zeyn-i Kabâdan Geçmedin
17 Haziran 2021 tarihinde yayınlanmıştır.
NUTK-İ ŞERÎF
Ey gönül tâvûslayın zeyn-i kabâdan geçmedin
Kendi 'aybın görmedin medh ü senâdan geçmedin
Sûrete aldanuban nakş u rüsûma dil verüp
Âhirin fikr etmeyüp deyr-i fenâdan geçmedin
Tıfl-ı nefsin her ne kim görse ana mâil olur
Yaşadın bunca yaşı vaz'-ı sabâdan geçmedin
Lezzetini tâ'atın hayfâ ki zevk eylemeyüp
Bu 'acebdir kâr-ı dünyâda inâdan geçmedin
Çok okudun Hazret-i Kur`ân'ı ma'nâ duymadın
Gâr-ı bîhûde gibi kuru sadâdan geçmedin
'İzzet-i fakr ile olmadın mülûk-ı hufyeden
Zillet-i minnetle bu sûrî gınâdan geçmedin
Merd olup sahrâ-yı mihnetde cihâdı görmedin
Beyt-i râhatda kalup tavr-ı nisâdan geçmedin
Seyl-i şehevâta vücûdun vârını habse verüp
Kârbân-ı Hakk ile cisr-i Hudâ'dan geçmedin
Göç tedârik eyle kim gitdi ikâmetden huzûr
Şemsiyâ sen durmayup fâsid recâdan geçmedin
Şemseddîn Sıvâsî
Kuddise Sırruh