Ey Gönül Var Sen Şefâat-kâna Her Dem Kıl Şitâb
12 Aralık 2022 tarihinde yayınlanmıştır.
NA'T-I ŞERÎF
Ey gönül var sen şefâ'at-kâna her dem kıl şitâb
Tâ ki ola feth-i bâb
'İzzetiyle dü cihân içre olasın kâm-yâb
Ger idesin intisâb
Kulluğundan nâşîdir ma'nâda emr-i saltanat
Hem sudûr-ı mekremet
Pertev-i mihr-i münîrinde göründü bu serâb
Bahr-ı lutfundan habâb
Gel serâb ile habâba eyle 'ibretle nigâh
Tâ bulasın vasla râh
Feyz-bahş-ı hestî-i 'âlemdir ol 'âlî-cenâb
Olmaz ana irtiyâb
Şems-i zâtından 'ukûl elbet anın kâsır olur
'Aksine nâzır olur
'Arş u kürsî mihr ü meh şerhinde nice fasl u bâb
Nâr u bâd u hâk ü âb
Ya'nî âsâr-ı hakâyık mücmelin tafsîl ider
Midhatin bir yıl ider
Nâme-i hestî yazılsa haşre dek olmaz hisâb
Deftere sığmaz kitâb
Ol gül-i hüsn-i ezelden şemmesin izhâr ider
Vasfını tekrâr ider
Gâyete irmez biri vasfında eyler iktisâb
Ma'nî-yi fasl-ı kitâb
Hâne-i dilde Salâhî yâri da'vet itmeğe
Ya'nî halvet itmeğe
Rez hulûsu ile cânda sırr-ı hâss-ı çâr kitâb
Sî-dü revzen heşt bâb
Abdullah Salâhaddîn Uşşâkî
Kaddesallahu Sırrahu'l-Âlî