Ey Hakîkat Nûru Ey Reşk-âver-i Şemsi'd-duhâ
13 Kasım 2020 tarihinde yayınlanmıştır.
NA'T-I ŞERÎF
Ey hakîkat nûru ey reşk-âver-i şemsi'd-duhâ
Hâk-i pâyin zerresidir âferînden mâ'adâ
Kanı bir mehtâb sen tek kanı sen tek şeb-çerâğ
Kanı sen tek âfitâb ey meh mudîen fi's-semâ
Kanı sen tek la'l-i şîrîn kanı sen tek şâh-ı dîn
Kanı sen tek nâzenîn ey gül bulunmaz fi's-serâ
Kanı sen tek zülf-i sünbül kanı sen tek rûy-ı gül
Kanı sen tek la'l-i mül 'âlemde yokdur intihâ
Defter-i zîbâda sen tek bir güzel yokdur bu kim
Eylemiş icrâ kemâlin sende tayy itmiş kazâ
Eyledikçe fikr-i evsâfın alır hayret beni
Şaşmışam ma'zûram ger vasfında itsem iktifâ
'Âciz-i vasfın Nigârî bî-nevâ ister kerem
İltifâtından demâdem ey Habîb-i Kibriyâ
Seyyid Hamza Nigârî
Kuddise Sırruh