Ey Hudâyâ Ben Zaîfe N'ola İhsân Eylesen
6 Şubat 2024 tarihinde yayınlanmıştır.
NUTK-İ ŞERÎF
Ey Hudâyâ ben za'îfe n'ola ihsân eylesen
Şol cemâlin vahdetin bu cânıma cân eylesen
Kaldı şunlar kim yolunda çâresiz bî-perr ü bâl
Seyyidin kurbu hakkı fazlını burhân eylesen
Yalınızam yarıcım yok senden âhar yâ Ganî
Lutfun ile yek nazar derdini dermân eylesen
Yâ Ganî naks olmayaydı rahmetinden zerrece
Derd-i 'aşkından bize bir zerre mihmân eylesen
İstemezdim 'izz ü câhı hayretin kılsa revân
Rûz u leylî gözlerimi yâş ile kân eylesen
Zulmet-i nefsin hicâbından beni eyle halâs
Berzah ilinde hemişe gül ü reyhân eylesen
Pertev-i nûrun tecellî kılsa ey Hakk bir kezin
Cân hümâsın Zelha-veş bu tende zindân eylesen
Seyr idüp sırran bekâ mülkin bu dil mürgü hezâr
Cânı bâşı terk idüp bu yola fermân eylesen
Ol şarâbın kırbasından eksilir mi ey sâkî
İçirüp ben miskine de mest ü hayrân eylesen
Mansûr'a sundun ezel bezminde vuslat şerbetin
Bin cânım olsa dirîğ olmaya kurbân eylesen
Niçe bir dem katre olup çağlayam ey pâdişâh
Ola kim dürler biteydi bahr-ı 'ummân eylesen
Çerçi oluban niçe bir sırça boncuklar satam
Hikmet ile kem metâ'ım la'l ü mercân eylesen
Bu Sinân Ümmî za'îfe kurbetin olsa karîb
Cân Yûsuf'un Mısr iline n'ola sultân eylesen
Elmalılı Sinân Ümmî
Kaddesallahu Sırrahu'l-Âlî