8 Nisan 2019 tarihinde yayınlanmıştır.
NUTK-İ ŞERÎF
Ey kamer tâ-be-seher 'aşk ile bîdârsın niçin
İştiyâkın şemse mi her demde seyyârsın niçin
Hâl ü şânın olmada her an televvünle 'ayân
Kâh hilâl olmakdasın kâh bedr-i nevvârsın niçin
Milk-i cânda dil-nüvâzın hangi şehnâzdır senin
Ferş-i nûr-i dîde etmekle nigehdârsın niçin
Reng ü bûda ser-firâz iken meyân-ı Zühre'de
Ey matar-ı gonca-i gül hemdem-i hârsın niçin
Müntehâ yok mürg-i dil feryâdına efgânına
Hâlet-i firkat ile vuslatda da zârsın niçin
Gâlibâ dürdâne-i 'aşkdır düşen dil ka'rına
Cûş edersin bî-sükûn mânend-i ebhârsın niçin
Âteş-i nîrânı da hayrâne eyler sûzişin
İbtilâ-yı nâr-ı ekdâr ile fevvârsın niçin
Hangi Leylâ eyledi mecnûn seni meftûn seni
Bî-ser ü pâ deşt-i hayretlerde devvârsın niçin
Hem-nişîn-i tahtgâh-ı sadr iken Lokmân-ı 'aşk
Etmiyor te'sîr-i müdâvât çün ki bîmârsın niçin
Sâmiyâ Tûr eylemişken nûr-i vahdet kalbini
lzdırâb-ı 'aşk ile ser-tâ-kadem nârsın niçin
Şeyh Abdurrahmân Sâmî Saruhânî
Kaddesallahu Sırrahu'l-Âlî