Ey Kamu Hüsn ü Melâhat İlinin Pâdişehi
20 Ocak 2023 tarihinde yayınlanmıştır.
NA'T-I ŞERÎF
Ey kamu hüsn ü melâhat ilinin pâdişehi
Cümle hüsn ehli sanadır dil ü cân ile rehî
Ruhin iklîm-i cemâlin şeh-i ferhundesidir
Hâcibin hâcibidir hâl ü hâtundur sipehi
Resen-i zülfünü dil tıflı salıncak düzedüp
Salınır bâğ-ı cemâlinde eyâ serv-i sehî
Âteş-i 'aşkınla şem' döküp hûnîn eşk
Geydi zer-beft koyup başına zerrin külehi
Gökde dönerler ayakları yire irmeyüben
Yüzüne alnına teşbîh ideli mihr ü mehi
Ayağın toprağıdır tâc-ı se'âdet başıma
Gözüme kuhl-i cevâhirdir anın hâk-i rehi
Rûşenî kimi tapupdur dil-i bî-tîre vü sâf
Zerrece olduğu'çün yüzüne şemsin şebehi
Dede Ömer Rûşenî
Kaddesallahu Sırrahu'l-Âlî