Ey ki Derdin Bu Benim Derdime Dermân Eyledim
9 Temmuz 2022 tarihinde yayınlanmıştır.
.jpg)
NUTK-İ ŞERÎF
Ey ki derdin bu benim derdime dermân eyledim
Ve'y ki zikrin 'aşk içinde mûnis-i cân eyledim
Sînemi 'aşkın oduna câna biryân eyleyüp
Gözlerimin yaşını hicrinle 'ummân eyledim
Sad-hezârân 'ıyd-ı 'aşka ben de İsmâ'îl'üvâr
Bâşımı itdim fidâ vü cânı kurbân eyledüm
Hem şehem bâzâr-ı 'aşkda bende-cân-bâz oluban
Dilde zikri dâimâ Allâhu Sübhân eyledüm
Şâha 'uşşâkın içinde "fakru fahrî" nefhasın
Ben gedâ da uruban 'âlemde i'lân eyledim
Çün ki sen sandın şarâb-ı şevk-i 'aşkın cur'asın
Aldım içdim câm-ı 'aşkdan mest ü hayrân eyledim
Ben şarâb-ı 'aşkı içüp hoş selâmet oluban
Fısk u zühdü şerr ü hayrı küfr ü îmân eyledim
Şâha 'aşkın girişme itdi câna şöyle kim
'Âr u nâmûs ile nâmı cümle tâlân eyledim
Ben anın 'aşkı şerâbın içüben her dem-be-dem
Şeh cemâlin görmek içün 'arşı meydân eyledim
Çün ki kalbim mâsivâdan 'aşk münezzeh eyledi
Dâimâ şâhenşehi ben bende mihmân eyledim
Murg-i kudsam bu kafesde hem şehinşeh mazharı
Ol benimle ben anınla bunda cevlân eyledim
Çün ki buldum ben tecellî ol cemâl-ı şâhdan
Zerresiyem n'ola beni Şems-i tâbân eyledim
Her ki tâlib olsa benden ol cemâlin nûruna
Kanda gerçeklik bulursam ben de ihsân eyledim
Akşemseddîn Velî
Kuddise Sırruh