Ey Mülket-i Velâyete Sultân-ı Râygân
14 Şubat 2023 tarihinde yayınlanmıştır.
İSTİMDÂD
Ey mülket-i velâyete sultân-ı râygân
Ey mürşid-i müsellem ü mümtâz bî-gümân
Her kime bâd-ı himmetle olursa ger vezân
Bî-iştibâh olur iki 'âlemde kâmrân
Yâ Seyyidü'r-Rufâ'î vü yâ pîr-i sâlikân
Yâ Hazret-i Ebü'l-'âlemeyn el-amân amân
Hem 'abd-i hâss u mukbil-i Settâr'sın meded
Hem nâm-dâş-ı Ahmed-i Muhtâr'sın meded
Hem mecma'-ı hakîkat-i esrârsın meded
Sâhib-tarîkat-ı ulü'l-ebsârsın meded
Yâ Seyyidü'r-Rufâ'î vü yâ pîr-i sâlikân
Yâ Hazret-i Ebü'l-'âlemeyn el-amân amân
Geldi kavlinden itmeğe irşâd-ı kâinât
Bî-iştibâh mürşid-i Keyyâli gibi zât
Tutsun elini kim der ise bulayım necât
Düşsün gubâr-ı pâyine görsün muhassenât
Yâ Seyyidü'r-Rufâ'î vü yâ pîr-i sâlikân
Yâ Hazret-i Ebü'l-'âlemeyn el-amân amân
Şîr-i jiyân u vahş u tuyûr itdi ser-fürû
Münkir ne cür'et ile atar saçma güft-gû
Evrâd u zikri sandı meger kuru hây hû
Îmân iden tutar reh-i tahkîke doğru rû
Yâ Seyyidü'r-Rufâ'î vü yâ pîr-i sâlikân
Yâ Hazret-i Ebü'l-'âlemeyn el-amân amân
İrmez velî kerâmetine fikret-i beşer
Hâlât-ı darbı sanma görüp âlet-i hüner
Yanmış ezel muhabbetullah ile meğer
Âteş en 'abd-i ahkarına eylemez eser
Yâ Seyyidü'r-Rufâ'î vü yâ pîr-i sâlikân
Yâ Hazret-i Ebü'l-'âlemeyn el-amân amân
Şâyân degil mi türbe-i 'âlîne oldu câ
Basra olursa bâsıra-i dehre tûtiyâ
Küstâh u rû-siyeh Şeref âyâ ne yüzle tâ
Gelmiş der-i 'inâyetine eyler ilticâ
Yâ Seyyidü'r-Rufâ'î vü yâ pîr-i sâlikân
Yâ Hazret-i Ebü'l-'âlemeyn el-amân amân
Şeref Hanım
Rahmetullahi Aleyhâ