Ey Nefis Şimden Gerü Ağyârı Terk Et Yâre Gel

4 Aralık 2019 tarihinde yayınlanmıştır.

NASÎHAT

Ey nefis şimden gerü ağyârı terk et yâre gel

Yetiştir etdiklerin tuğyân u 'ısyân u dagal

Sû-yi akrâna uyup siydin Hudâ'nın emrini

Kılmadın bu ana dek aslâ rızâsınca 'amel

  

Seçmedin hergiz helâl ile harâmın beynini

Cîfe-i dünyâyı bel' etdin hemân misl-i zagel

Sûretâ mü'minsin ammâ gizli şirk içinde var

Çün hakîkatde mürâîdir behâimden 'edall

Yolcusun yok zâd-ı râhın yükün ise pek sakîl

San'atın ta'mîr-i dünyâ hedm-i dîn tûl-i emel

Bakmadın 'ibret gözüyle Hâlık'ın masnû'una

Kaplamış endâmını hep gaflet ü sehv ü kesel

Hem lisânınla Hudâ'nın zikrin iksâr etmedin

Söyledin gıybet yalan çok i'tirâz ile cedel

Hakk kelâmı hîç kulağınla işidüp tutmadın

Hey'etin insândır ammâ işlerin cümle dagal

Hayr işe yapışmadın destinle çok şerr işledin

Bilmezem ki kurtulur mu nâr-ı dûzahdan bu el 

Ayağınla gitmedin bir hatvecik Hakk yoluna

Köhnelendi şimdi a'zâ dahi yaklaşdı ecel

Kalbin ile etmedin bir dem tefekkür sıdk ile

Ki neler halk eylemişdir Kirdigâr-ı lem yezel

Kendini sen zann edersin cümleden sâlim kavî

İç ü dışın dopdolu emrâz u eskâm u 'ilel

Hâsılı budur kelâmın bilmiş ol etme gurur

Cümle a'mâlinde vardır bî-şümâr 'ayb u halel

Mâsivâsından geçüp Allah'a gel Kuddûsiyâ

Külli şey' hâlikdir illâ vech-i Mevlâna'l-ecell

Ahmed Kuddûsî

Kuddise Sırruh