Ey Pâdişeh-i Milk-i Ebed Nûr-i Mukaddem
19 Ocak 2019 tarihinde yayınlanmıştır.
NA'T-I ŞERÎF
Ey pâdişeh-i milk-i ebed nûr-i mukaddem
Ey bârigeh-i silk-i meded bahr-i mu'azzam
Ey fâtiha-i cümle-i esmâya mu'allem
Ey hâtime-i künh-i müsemmâya mutalsam
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Ey nûr-i mücellâsı olan kabza-i ûlâ
Ey zerre-i yektâsı hemân madde-i eşyâ
Ey gurra-i a'lâsı 'ayân mazhar-ı esmâ
Ey sırr-ı hakîkîsi nihân zıll-i müsemmâ
Sen sadr-ı risâletde güzîn şâh-ı bekâsın
Firdevs-i nübüvvetde mekîn mâh-ı Hudâ'sın
Ey câmi'-i envâr-ı kemâlât-ı mu'allâ
Ey sâtı'-ı esrâr-ı nihâyât-ı muhallâ
Ey lâmi'-i etvâr-ı makâmât-ı tecellâ
Ey tâli'-i akmâr-ı hidâyât-ı tedellâ
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Ey ma'den-i sâdât-ı nihâyât-ı visâlî
Ey me'men-i gâyât-ı bidâyât-ı nevâlî
Ey medfen-i râyât-ı hidâyât-ı cemâlî
Ey mahzen-i âyât-ı risâlât-ı kemâlî
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Ey kabza-i yektâ-yı Hudâ zübde-i mahbûb
Ey kıdve-i tuğrâ-yı ulâ sidre-i matlûb
Ey 'umde-i a'lâ-yı bekâ dürre-i mergûb
Ey lem'a-yı bâlâ-yı bekâ cezbe-i merbûb
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Ey ism-i şerîfi 'ilm-i 'âleme mestûr
Ey cism-i latîfi sadef-i "nûrun 'alâ nûr"
Ey hilm-i cemîli heme 'âlemlere menşûr
Ey 'ilm-i celîli kalem-i levh ile mezbûr
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Ey âyet-i Kur'ân ile her hasleti mahmûd
Ey ni'met-i yezdân ile kudsiyyeti mes'ûd
Ey kudret-i Sübhân ile hulkiyyeti maksûd
Ey rahmet-i 'ummân ile ulviyyeti memdûd
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Ey encüm ü şems ü kamere nûr-i zıyâ-tâb
Her feyzi sana etdi 'atâ Vâhib ü Vehhâb
Sensin ezelî kenz-i Hakk ızhârına esbâb
Sensin ebedî saltanatın sadrına mihrâb
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Ey yârelere derde devâ Ahmed ü Mahmûd
Bîçârelere çâre-resâ Ahmed ü Mahmûd
Bîçârelere çâre-resâ Ahmed ü Mahmûd
Ey sînelere sadra şifâ Ahmed ü Mahmûd
Ey dîdelere nûr u zıyâ Ahmed ü Mahmûd
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Hâkân-ı havâkîn-ı beka bedr-i Muhammed
Burhân-ı berâhîn-i likâ sırr-ı Muhammed
Batnân-ı bevâtîn-i hüdâ bahr-i Muhammed
Sultân-ı selâtîn-i Hudâ nûr-i Muhammed
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Bu bende-i âvâreye gel eyle şefâ'at
Şermende-i bîçâreye gel eyle şefâ'at
Efgende-i nâçâreye gel eyle şefâ'at
Sâmî-i yüzü kâreye gel eyle şefâ'at
Sen sadr-ı risâletde güzîn şâh-ı bekasın
Firdevs-i nübüvvetde mekîn mâh-ı Hudâ'sın
Şeyh Abdurrahmân Sâmî Saruhânî
Kaddesallahu Sırrahu'l-Âlî