Ey Resûl-i Arabî Mâh-ı Dü Kevn-i Medenî
26 Ekim 2020 tarihinde yayınlanmıştır.
NA'T-I ŞERÎF
Ey Resûl-i 'Arabî mâh-ı dü kevn-i Medenî
Şâh olur sâil-i bâbın ne kadar olsa denî
Ünsünü bulmak ile mahrem-i 'arş olmadı mı
Tîh-i vahşetde şübân iken Üveys-i Karanî
Zîr-i na'linde olan kumlarına gıbta eder
Tâc-ı şâhânda olan dürr-i semîn-i Adenî
Seng-i sahrâsına reşk eyler-iken la'l-i cinân
Hîç hisâba gele mi anda akîk-i Yemenî
Saltanat mansıbını vermeğe çok minnet eder
Hân-ı fazlında zübâb olmağa hâkân seni
Berr-i 'aşkında şehâ şevk ile 'uşşâk-ı safâ
Bulmadı zîr-i mugaylân gibi zîbâ çemeni
Nutk-ı cân-perveri her kanda olsa rûh-efzâ
Dem-i hikmetle o dem aça mı 'Îsâ deheni
"Lî ma'allah" tûruna ağdıkda sen şâh-ı rüsul
Tûr-ı Sînâ'da Kelîm eyleye kûteh suheni
Ser-i kûyunda şehâ şemm eden âsârından
N'eyler ol 'anber-i hâmı dahi müşk-i Huten'i
Dâmen-i mahmilini etdi temessük Şemsî
Dilde a'zâr-ı hezâr boynuna takmış reseni
Şemseddin Sıvâsî
Kuddise Sırruh