Ey Sâkî Bu Dem Dem-i Tahıyyât
12 Kasım 2020 tarihinde yayınlanmıştır.
NA'T-I ŞERÎF
Ey sâkî bu dem dem-i tahıyyât
Vir bâde kılam salâtı bi'z-zât
Ne bâde salât ile muhammer
Bâde-i tahıyye-i peyamber
Ey dîde-i zübde-i dü 'âlem
Ey eşref-i nesl-i cân-ı Âdem
Her lahza dürûd-ı hûb her dem
Olsun sana ey Habîb-i Ekrem
Gerçi bilirem ki sana lâyık
Elbet idemem salât-ı fâik
Ammâ ki bu kâra var şevkim
Bu kâr iledir müdâm zevkim
Senden dilerem ki ey şehen-şâh
Tab'ımı demâdem it nazar-gâh
Tâ kim nazarınla ola âgâh
Esrâr-ı salâta ey şehen-şâh
Ey câmi'-i kelime-i ma'ârif
V'ey kenz-i hafiyye cümle 'ârif
Gerçi idemem sana münâsib
Şâyeste salât lîk gâlib
Fikrimde budur salât-ı kâim
Gönlümde dilimde ola dâim
Her lahza bana nazar kıl ey şâh
Güftâr-ı dürûdum ola her gâh
Her dem sana bin salâtım olsun
Her lahza bu vâridâtım olsun
Ey şâh-nişîn-i 'arz-ı a'zam
V'ey şâhid-i Hakk Nebiyy-i Ekrem
Hakk'dan dilerem salât-ı hâlid
Kılsın sana ey Habîb-i Câvid
Evrâd-ı salâtın ola kâim
Gönlümde dürûdun ola dâim
Güftâr-ı salât ile virem cân
'Aşkında ki ey Habîb-i Rahmân
Tâ sen olasın ki şâd u hurrem
İtdikce salât-ı hûb-ter hem
Olaydı eğer kim 'ömr-i bâkim
Güftâr-ı salât olurdu râkım
Bu zevk ile subh u şâm iderdim
Güftârımı hep selâm iderdim
Her vakt salât olurdu yârım
Her lahza dürûd olurdu kârım
Ey Bârî Hudâ be-hakk-ı hestî
Her lahza merâmımdır firistî
Zeyn-i bihr kılam salât-ı bî-hadd
Ber cân-ı Muhammed âl-i emced
Senden dilerem bu güft ü gûlar
Hâsıl ola hoş bu arzûlar
Gitdikçe salâtım ola bî-pâ
Bir 'ârız-ı Mustafâ musaffâ
Ey pâdişeh-i zemîn ü eflâk
V'ey tâc-ı ser-i kelâm-ı levlâk
Sen olmasan olmaz idi 'âlem
Gelmezdi vücûda 'arş-ı a'zam
Sen asl-ı kamu kamu tufeylin
Sen server-i cümle cümle haylin
Ey kâşif-i kenz-i mağz-ı Kur`ân
Sensin sebeb-i vücûd u îmân
Sensiz mi olur vücûd u 'âlem
Sensiz mi olur mükerrem âdem
Bes vâcib idek sana selâmı
Her lahza dürûd-ı müstedâmı
Her çend salâta himmetim var
Be-gâyet selâma rağbetim var
Olmazsa meded eğer ki senden
Bu kâr-ı 'azîm olur mu benden
Ey bâr-ı Hudâ budur temennî
Öyle idesin ki bir tecellî
Dâim senin ile ola vârım
Evsâf-ı cemîlin ola kârım
Hem vasf-ı habîbin ola fikrim
Kur`ân-ı tahıyye ola zikrim
Ey hamd-i müdâmî sana kârım
Geçsin heme böyle rûzgârım
Olsun heme dem salât-ı bî-hadd
Ber Ahmed ü âl ü sahb-i Ahmed
Bî-hamd 'ömr bana ne lâzım
Lâzımdır ana olam mülâzım
Ber cân-ı Muhammed'e tahıyyât
İtmen bize farz lîk bi'z-zât
Ey Bârî Hudâ salât-ı dâim
Hamdinle ola dilimde kâim
Hamdinle gece günüm müdâm it
'Ömrümü salât ile tamâm it
Ey dil bu yeter ki takrîr itdin
Evsâf-ı salâtı tahrîr itdin
Hatm eyle salât ile kelâmı
Tâ kim ola hüsn-i ihtitâmın
Bâ yârî-i hamd ü bâ tahıyyât
Elbette olur murâd-ı bi'z-zât
Ey Bârî Hudâ hayâtım olsun
Hamdinle müdâm salâtın olsun
Ber cân-ı Muhammedü'l-emîn'e
Reşk-dih-i bûy-i yâsemîne
Seyyid Hamza Nigârî
Kuddise Sırruh