Ey Sâlik-i Hakk Sa'y Edüben Kesb-i Hüner Kıl
23 Haziran 2022 tarihinde yayınlanmıştır.
NUTK-İ ŞERÎF
Ey sâlik-i Hakk sa'y edüben kesb-i hüner kıl
Ko gayrisini Hazret-i Yezdân'a sefer kıl
Aldanma sakın nakşına bu dâr-ı fenanın
Sehhâredir ol kendini pek verme hazer kıl
'Uşşâka harâm dedi Resûl iki cihân bil
Meyl etme ana zen gibi sen kendini er kıl
Bir katre menî idi senin çünki esâsın
Pes nefsini bil hikmet-i Hallâk'a nazar kıl
Var eyledi bu halkı deyüp "kün" yoğ iken hîç
'İbretle gözün aç nazarın zîr ü zeber kıl
Kuddûsî-yi bîçâre düşün kudret-i Hakk'ı
Dil köşkünü pâk eyleyüp ol şâha makar kıl
Ahmed Kuddûsi
Kuddise Sırruh