Ey Şehen-şâh-ı Velâyet Bî-gümân
13 Şubat 2023 tarihinde yayınlanmıştır.
İSTİMDÂD
Ey şehen-şâh-ı velâyet bî-gümân
Cedd-i pâkindir Resûl-i Müste'ân
Ser-firâz-ı evliyâ vü ins ü cân
Sana mahsûs oldu kurbiyyet hemân
El-amân ey destgîr-i 'âcizân
El-amân ey gavs-i a'zam el-amân
Nâmın 'Abdulkâdir-i Geylânî'dir
Kadr ü şânın cümlenin rüchânıdır
Dergehin feyz ü kerâmet kânıdır
Hâk-i pâyin derdliler dermânıdır
El-amân ey destgîr-i 'âcizân
El-amân ey gavs-i a'zam el-amân
Eyledin îcâd tarîk-i şâh-râh
Server-i pîrânsın yok iştibâh
Âsitânın eyleyen püşt ü penâh
Eylemez taht-ı Ferîdûn'a nigâh
El-amân ey destgîr-i 'âcizân
El-amân ey gavs-i a'zam el-amân
Ser-fürû itse nola bây u gedâ
Rütbe-i kadrin bilir arz u semâ
Tâ ezelden eylemiş zâtın Hudâ
Ser-firâzâ şehr-yâr-ı evliyâ
El-amân ey destgîr-i 'âcizân
El-amân ey gavs-i a'zam el-amân
Mübtelâ tevhîdine ins ü beşer
Reşk ider devrânına şems ü kamer
Bendegânın üzre her şâm u seher
Şâhbâz-ı himmetin pervâz ider
El-amân ey destgîr-i 'âcizân
El-amân ey gavs-i a'zam el-amân
Hîç 'abâ-pûşun çeker mi minneti
Hırkası besdir ne yapsın hıl'ati
Efser ü şâla ider mi rağbeti
Buldular tâc u kemerle ziyneti
El-amân ey destgîr-i 'âcizân
El-amân ey gavs-i a'zam el-amân
Güllerin ey 'andelîb-i Kirdigâr
Çekmez aslâ intizâr-ı nev-bahâr
Haşre dek dervîşin itse vechi var
İntisâb-ı dergehin ile vakâr
El-amân ey destgîr-i 'âcizân
El-amân ey gavs-i a'zam el-amân
Tâ ebed itmekdesin sen ey emîr
Sâlikânın matbah-ı cûdunda sîr
Derdmendâne olurken destgîr
Kala lâyık mı Şeref gibi fakîr
El-amân ey destgîr-i 'âcizân
El-amân ey gavs-i a'zam el-amân
Şeref Hanım
Rahmetullahi Aleyhâ