Ey Tarîk-i Hakk'ı Dâim Eyleyenler Cüst u Cû
21 Şubat 2022 tarihinde yayınlanmıştır.
NUTK-İ ŞERÎF
Ey tarîk-i Hakk'ı dâim eyleyenler cüst u cû
Görmek isteyen cemâl-i pâdişâhı rû-be-rû
Giceler tâ subh olunca nâle vü feryâd idüp
Kanda baksa isteyenler görmeğe dîdâr-ı Hû
Bağrı başlı gözü yaşlı derd ile âh eyleyüp
Vuslat-ı dîdâr-ı yâri eyleyenler arzû
Okudum yazdım cemi' 'ilmi bildim anladım
Nice meclislerde oldu nice nice güft ü gû
Evvelinin evveli yok âhirinin âhiri
'Âlem-i hayretde 'âlem halkı hep hayrân kamu
Gel gel ey tekmîl-i nefs itdim deyü da'vâ iden
Ehl-i irşâdım deyü bu halka hem da'vâ iden
Dahi sen yok olmadın bu varlıġa irmek neden
Kendin idrâk itmeden bir gayrisin iğvâ neden
Kendi bilgindir sana bildirmeyen ma'bûdunu
Varlığındır sana kendin görmeğe ilkâ iden
"Mâ 'arefnâk" dedi mahbûb-i Hudâ iken Resûl
Kim basîretsizdir ol bildim deyü da'vâ iden
Evvelinin evveli yok âhirinin âhiri
'Âlem-i hayretde 'âlem halkı hep hayrân kamu
Enbiyâ vü evliyâ ebrâr-ı Hakk 'âlî-cenâb
Müftî mollâ vü müderris kâdî vâ'iz şeyh ü şâbb
Cümle ol bâb-ı rızâda zâr u sergerdân kamu
Yüzlerin dergâh-ı Hakk'a eylemişlerdir türâb
Ehl-i tevhîde merâtib "lâ"da 'âlem mahvolur
Menzil-i "illâ"da hükm anın dahi kalmaz cevâb
Evvel ü Âhir Hüve'l-Hayyüllezî'dir lâ yemût
Zâhir ü Bâtın hem ol vallâhu a'lem bi's-sevâb
Evvelinin evveli yok âhirinin âhiri
'Âlem-i hayretde 'âlem halkı hep hayrân kamu
Ömrümü harc eyledim bu yolda mihnetler çeküp
Paslanup taşa düşüp topraġa mihnetler çeküp
Giceler evrâd u ezkâr ile ihyâlar idüp
Nice nice erba'înler nice halvetler çeküp
Diz çöküp pîrler önünde nice rü'yâlar dedim
'Âlem-i kalbi musaffâ itmeğe derdler çeküp
Bunu bildim bunu duydum bunu idrâk eyledim
Bu tarîk-i Hakk'da yüz bin türlü firkatler çeküp
Evvelinin evveli yok âhirinin âhiri
'Âlem-i hayretde 'âlem halkı hep hayrân kamu
Nahiv sarf mantık meânî fıkıh ferâiz ey civân
'İlm-i Hakk'ı eylemişler kâdir oldukça beyân
Nice bin türlü mesâil nice hall-i müşkilât
Olmuş amm3a vermemişler bî-nişândan bir nişân
Anı bildim bilmez anı bildiğini terk etmeyen
Lâ-şerîk olmaz aradan gitmeyince cism ü cân
Katre çün müstağrak-ı bahr oldu Seyyid Seyfî bil
Fânî oldu cümle 'âlem kaldı Allah câvidân
Evvelinin evveli yok âhirinin âhiri
'Âlem-i hayretde 'âlem halkı hep hayrân kamu
Seyyid Nizâmoğlu Seyyid Seyfullah
Kuddise Sırruh