Ey Zât-i Şerîfin Sebeb-i Hilkat-i Eşyâ
24 Ocak 2023 tarihinde yayınlanmıştır.
.jpg)
NA'T-I ŞERÎF
Ey zât-ı şerîfin sebeb-i hilkat-i eşyâ
Şâhid şeref-i zâtına "Yâsîn" ile "Tâhâ"
Ey tâc-ı "le 'amrük" güher-i zîver-i şânın
Hâk-i kademin tâc-ı ser-i 'arş-ı mu'allâ
Sen gevher-i deryâ-yı ezel ma'din-i gevher
Sen dürr-i giran-mâye sadef Yesrib ü Bathâ
Zîrâ yaraşır kâmetine hil'at-i levlâk
Esrâ ile oldunsa mutarrâ dahi a'lâ
Efkendesidir kâmetinin Sidre vü Tûbâ
Müştâkı yüzün gülşeninin cennet-i me'vâ
Cârûb-keş-i gerd-i harîmin per-i Cibrîl
"Evhâ" ile vassâf-ı cenâbın "fe tedellâ"
Levh-i ruhin âyîne-i envâr-ı ilâhî
Pâkîze kelâmın güher-i gûş-i şinâvâ
'Âlemlere gönderdi Hudâ zâtını rahmet
Hakkâ ki cihân mürde iken eyledin ihyâ
Lutfunla Sabûhî-i hakîre nazar eyle
Ey kıble-i hâcât-ı dil-i ehl-i temennâ
Sabûhî Ahmed Dede
Kuddise Sırruh