Ey Zuhûrun Âfitâb-ı Pertev-i Envâr-ı Zât
11 Aralık 2022 tarihinde yayınlanmıştır.
NA'T-I ŞERÎF
Ey zuhûrun âfitâb-ı pertev-i envâr-ı zât
Mâye-i feyz-i hayât
Vech-i pâkinden göründü dav'-ı esmâ vü sıfât
Nûr ile doldu cihât
Şems-i zâtın olmasa zulmetde kalırdı sivâ
Nistîde bî-nevâ
Rütbe-i ekvâna irmez idi sensiz kâinât
'Âliyât u sâfilât
Bâ'is-i imkân-ı 'âlemdir vücûdun bî-merâ
Hestî-i her dü serâ
"Rahmeten li'l-'âlemîn"sin cümleye sensin necât
Fi'l-hayâti ve'l-memât
Ey şefâ'at kânı mahbûb-ı Hudâ-yı lem-yezel
Yâr-ı Hakk 'azze ve cell
Senden istimdâd ider vahşetlerinde her 'usât
Mü'minîn ü mü'minât
Sen şefâ'at itmez isen mücrim-i şermendeye
Ya'nî 'âsî bendeye
Ol sırât-ı müstakîm üzre nice bulur sebât
Ana olur mu necât
Hâşe lillah kim şefâ'at-hâhı mahrûm idesin
Kan iderken dîdesin
Çün raûf u hem rahìm oldu sana 'âlî-simât
Nâ-ümîd olmaz 'usât
Kesret-i emvâc ile keştî şikeste dil hazîn
Düşdü girdâba karîn
Kıl Salâhî bendene lutfun ile bir iltifât
Ey ferîd-i bahr-ı zât
Abdullah Salâhaddîn Uşşâkî
Kaddesallahu Sırrahu'l-Âlî