Eyâ Gâfil Bu Gafletden Uyâne
17 Mart 2019 tarihinde yayınlanmıştır.
NASÎHAT
Eyâ gâfil bu gafletden uyâne
Bu gaflet uykusuna sen de kâne
'Ömür gün gün geçer sen hoş ferâgat
Verirsin assıyı her dem ziyâne
Nice bir nice bu nefsin murâdı
Bu aşkın rengine gel bir boyâne
Şular kim 'aşk ile hem-renk olupdur
Oları aldayamaz nakş-ı hâne
Senin gönlün bu 'âlem nakşın almış
Kılamazsın taleb ol bî-nişâne
Önü kâfilenin menzile erdi
Yabanda kaldın uş sen sanu sâne
Geceler gaflet ile yatma zinhâr
Durugel erişegör kârbâne
İşini bitir erken kendine gel
Sana göymez ahi şâhım zamâne
Devâsına bu nefsin uyma zinhâr
Habîb rahm eylemez nefse uyâne
Bezersin teni nefsi bî-habersin
Hacâlet getirirsin akla câne
Usan olma azığın andak alma
Sefer kılmak gereksin ol cihâne
Gidersen ol uzak yollara bir gün
Azık binit gerek anda gidâne
Anın menzilleri yolak uzakdır
Azıksız yayalar doymaz benâne
Resûl dedi vatan sevmek îmândan
Niçün senin hevesin yok vatâne
Varıcak ol bekâ mülkün yıkarsın
Dürüşürsün dün ü gün bu vîrâne
'Ömür sermâyesini yele verdin
'Aceb esrik misin yâhud dîvâne
Bu dünyâ fânî lezzetleri fânî
Bu zişti nice bir sevmek usâne
Bu sahrâda gelenler bunda yitdi
Ne pîr eğlendi bunda ne civâne
Gelen geçer konan göçer dolunmaz
Bu gelmekden murâd ne sor gelâne
Gelânı gör durânı gör ki kimdir
Sora vardığı kimdir şol gidâne
Cihân zeyrekleri kim geldi gitdi
Bu sırdan vermediler bir nişâne
Velî şular ki diri iken ölüpdür
Olar erişdi bu râz-ı nihâne
Bu deryâdan bular çıkardı dürrü
Olar girdi bu bahr-ı bî-pâyâne
Gel imdi sen de ölmezden ön ölgil
Eriş tahkîke düşme gel gümâne
Gümân ile îmân bir yerde durmaz
Gümânı ko imâne gel îmâne
Hakîkat iş bilinmez olmayınca
Bulunmaz yol seni bunda salâne
Nice elfâz-ı ma'nâ bahs edersin
Serâbı su sanup düşdün yabâne
Eğer yüz yıl serâba sen seğirtsen
Kalasın şöyle teşne yâne yâne
'Amel kıl 'ilm ile ko kıyl ü kâli
Geç aldanma bu kuru âd u sâne
Enâniyyet sebelin sil gözünden
Hakîkat göz ile bak bu cihâne
Göresin şemsi her zerrede zâhir
Her eşyâda görüne Hakk 'ıyâne
Sana sen ben demekden utanasın
Olasın sen dahî gele lisâne
Özünden ol sâ'at fânî olasın
'Urûc eyleyesin heft âsümâne
Fenâdan bir bekâya eresin kim
Niteliği anın gelmez beyâne
Eğer hâsıl olursa işbu makâmât
Varup seyrin erişe lâ-mekâne
Çağırup Eşrefoğlu Rûmî eydür
Salâdır gelsin ol câne kıyâne
Gözünden götüren benlik hicâbın
Göre kim âşina kimdir bî-gâne
Bize cân vereni gerek budur söz
Sözümüz yok bizim câne kıyâne
Şular kim öldü bu yolda ecelsiz
Olar erişdi 'ömr-i câvidâne
Eşrefoğlu Rûmî
Kuddise Sırruh