Eyâ Habîb-i Hudâ Yâ Muhammed-i 'Arabî

19 Ocak 2023 tarihinde yayınlanmıştır.

FERYÂD-I 'ANDELÎB-İ HÂME-İ RENGİN-NAĞAM DER-GÜLŞENİSTÂN-I

SENÂ-YI HABîB-İ EKREM SALLALLÂHU 'ALEYHİ VE SELLEM

Eyâ Habîb-i Hudâ Yâ Muhammed-i 'Arabi

Şefî'-i rûz-i cezâ Yâ Muhammed-i 'Arabî

Hevâ-yi gerdiş-i mihrinle çarka girmişdir

Süradikât-i semâ Yâ Muhammed-i 'Arabî

Ol şehsuvâr-ı hünersin ki cilvegâhındır

Fezâ-yi nûr u zıyâ Yâ Muhammed-i 'Arabî

Sen ol tabîb-i şifâ-bahşsın ki her bir nefesin

Verir 'usâta şifâ Yâ Muhammed-i 'Arabî

Hakîm-i sun' komuş hokka-i dehânında

Marîz-i cürme devâ Yâ Muhammed-i 'Arabî

Şefâ'atinle olur zîb-i kâmet-i rahmet

Pelâs-i cürm ü hatâ Yâ Muhammed-i 'Arabî

Esîr-i la'l-i şefâ'at-nisârın olmuşdur

Kemâl-i hüsn ü edâ Yâ Muhammed-i 'Arabî

Tefâhür etmededir hizmet-i rikâbınla

Emîn-i vahy-i Hudâ Yâ Muhammed-i 'Arabî

Kilîd-i kufl-küşâ-yi hazâin-i rahmet

Elinde cilvenümâ Yâ Muhammed-i 'Arabî

Kılındı rûz-ı ecel cilve-i cemâline hâs

Kalem-rev-i dü serâ Yâ Muhammed-i 'Arabî

Güşâd-yâfte-i tîg-i berk-i hüsnündür

Der-i serây-ı dücâ Yâ Muhammed-i 'Arabî

Libâs-ı sâyeden oldun bürehne-cism itdin

O denlü terk-i sivâ Yâ Muhammed-i 'Arabî

Çemenistân-ı bihişte sehâb-ı feyzindir

Medâr-ı neşv ü nemâ Yâ Muhammed-i 'Arabî

Kemîne mevce-i bahr-ı muhît-i fazlındır

Bidâ'a-yı 'ulemâ Yâ Muhammed-i 'Arabî

Niyâz-ı ruhsatı bâb-ı siyâdetinden ider

Şefâ'at-ı şüfe'â Yâ Muhammed-i 'Arabî

Nüfüzu olmaz o emrin ki olmaya senden

Rakam-pezîr-i rızâ Yâ Muhammed-i 'Arabî

Olur o tîr ki çıkmaz kemân-ı re'yinden

Nişâne-gir-i hebâ Yâ Muhammed-i 'Arabî

Bu kârgehde değil senden özgeye mahsûs

Senâverî-i senâ Yâ Muhammed-i 'Arabî

Nigâh-ı lutfuna mevkûfdur kıyâmetde

Terâzî-i husemâ Yâ Muhammed-i 'Arabî

Himâyetinle çıkar rûz-ı haşrda gâlib

Sipâh-ı havfe recâ Yâ Muhammed-i 'Arabî

İşâret-i nazar-ı merhamet-nisârındır

Devâ'î-i 'ukalâ Yâ Muhammed-i 'Arabî

Hisâbgâh-ı kıyâmetde iltifâtındır

Temessük-i ümenâ Yâ Muhammed-i 'Arabî

Firâz-ı minber-i 'izzetde zikr-i nâmındır

Vazîfe-i hutyâ Yâ Muhammed-i 'Arabî

Temevvüc-i yem-i lutf-ı günâh-şûyundur

Metâmi'-i gufelâ Yâ Muhammed-i 'Arabî

Zuhûr-ı 'afv-ı 'atâ-bahş-ı cürm-pûşundur

Metâlib-i fukarâ Yâ Muhammed-i 'Arabî

Künâse çîni-i dergâh-ı feyz-pâşındır

Emânî-i üdebâ Yâ Muhammed-i 'Arabî

Dıraht-ı şer'inin esmâr-ı pîş-reftesidir

Şerâyi'-i kudemâ Yâ Muhammed-i 'Arabî

Sukâta-i ni'am-ı sufre-i 'ulûmundur

Merâkî-i hukemâ Yâ Muhammed-i 'Arabî

Değil resîde pesîn-pâye-i 'ibâretine

Medâric-i fusehâ Yâ Muhammed-i 'Arabî

Kenâr-ı dâmenidir câme-i belâgatinin

Merâtib-i bülegâ Yâ Muhammed-i 'Arabî

Nühüfte kevkebidür târem-i melâhatinin

'Azîz-i Mısr-ı behâ Yâ Muhammed-i 'Arabî

Zekât-ı çeşm-i Hudâ-bîninin tırâşesidir

Müşâhid-i 'urefâ Yâ Muhammed-i 'Arabî

Tefevvuk eyleyemez intisâb-ı bâbınla

Sıfât-ı fakra gınâ Yâ Muhammed-i 'Arabî

Siyeh-rûy güneh-kâr Nâbî-i bed-kâr

İder ümmîd-i 'atâ Yâ Muhammed-i 'Arabî

Şâir Nâbî

Rahimehullah