MuzafferOzak.com (Türkçe)

NA'T-I ŞERÎF

Eyâ şâh-ı risâlet nûr-bahş-ı "kün fe kân"sın sen

Serîr-ârâ-yı bi'set pâdişâh-ı ins ü cânsın sen

Vücûdun müntehabdır nüsha-i i'câzdan evvel

Hoşâ díbâce-bend-i safha-i âhir zamânsın sen

İmâm-ı evliyâsın muktedâ-yı enbiyâsın hem

Ezelden bâdî-i inşâdî-i kevn ü mekânsın sen

Mübârek hâkpâyin kuhl-i çeşm-i asfiyâdır hep

'Uyûn-i nâsa "mâ zâgal basar"la müstebânsın sen

Yed-i beyzâ-yı Mûsâ hayret-efzâ olmasın zîrâ

Şikâf-ı çehre-i mehle müşârun-bi'l-benânsın sen

Kalır derkinde âciz zâtını fikr-i dakîk elbet

Medâr-ı gerdiş-i nüh-âsiyâ-yı âsumânsın sen

Küşâd etdin cenâh-ı re'feti şevk-i rü'yetle

Hevâ-yı nezd-i Hakk'da bir hümâ-yı lâ-mekânsın sen

Ki bür'ü’s-sâ'adır bîçâregâna şerbet-i la'lin

Şifâ-sâzî-i derd-i bî-devâ-yı 'ârifânsın sen

Şefâ'at yâ Resûlallah şefâ'at Şemsî-i zâre

Sükûnet-bahş-ı âh-ı bî-kesân-ı 'âşıkânsın sen

Osman Şems Efendi

Kuddise Sırruh

Eyâ Şâh-ı Risâlet Nûr-bahş-ı "Kün Fe Kân"sın Sen