Eyâ Şâh-ı Rusül İksîr-i Hâk-i Dergehin Hakkâ
16 Aralık 2022 tarihinde yayınlanmıştır.
NUTK-I ŞERÎF
Eyâ şâh-ı rusül iksîr-i hâk-i dergehin hakkâ
Olur ehl-i dile kimyâ
Odur ma'nâda hikmet üzre kühl-i çeşm-i nâ-bînâ
K'ider çeşm-i dili bînâ
Derinden gayrıya varmak olupdur müntic-i hüsrân
Eyâ kân-ı kerem el-ân
Der-i devlet-meâbın mübtelâya mesned-i istâ
Olur ma'nâda ser-tâ-pâ
Şeh-i şâhân-ı 'âlem hizmetinle iftihâr eyler
Cihânda özge kâr eyler
Ser-i iclâle la'lin tâc ider rağbet ile dânâ
Ana 'izzet virir Mevlâ
Dü 'âlem devletin cem' ider elbet bende-i hâssın
Ferîdân ehl-i ihlâsın
Nigâh-ı ihtisâsınla ferîdinden olur a'lâ
Anı kul idemez dünyâ
Sana rağbet iden hâlis dü kevne i'tibâr itmez
Sivâyı ihtiyâr itmez
Fenâ ile makâm olur ana ol menzil-i bâlâ
Nedir dünyâ nedir 'ukbâ
Dü 'âlem ol tecellî-i cemâle bir bedel olmaz
Hakâyıkda cedel olmaz
Sivâ rengi fenâya irişir bâkî kalır Mevlâ
Kalır mı anda hîç kavgâ
Salâhî mâsivâdan göz yumup dildâra bakdınsa
Ana su gibi akdınsa
Olursun bahr-ı vahdetde sadefden dürre-i yektâ
Ki hîç olmaz ana hemtâ
Abdullah Salâhaddîn Uşşâki
Kaddesallahu Sırrahu'l-Âlî