Eyâ Şehenşeh-i Zî-Rütbet Es-Selâmu Aleyk
10 Ekim 2022 tarihinde yayınlanmıştır.
.jpg)
NA'T-I ŞERÎF
Eyâ şehen-şeh-i zî-rütbet es-selâmu 'aleyk
Ve yâ hazîne-i pür-hikmet es-selâmu 'aleyk
Yaratdı zâtını Hakk zât-ı pâkine mahbûb
Zihî kemâl zihî şöhret es-selâmu 'aleyk
Şefî'-i rûz-ı cezâ nâzenîn-i yâr-i Hudâ
Emîr-i memleket-i 'ismet es-selâmu 'aleyk
Vücûda geldi seninçün cemî'-i mevcûdât
Kamuya bâ'is-i cem'iyyet es-selâmu 'aleyk
Cinân u arz u semâ 'arş u kürs ü levh u kalem
Seninle buldu fer ü zînet es-selâmu 'aleyk
'Atâ vü lutfuna muhtâcdır senin Cibrîl
Düşüp rikâbına der elbet es-selâmu 'aleyk
Devâ-yı derdini Lokmân diler cenâbından
Tabîb-i hâzık-ı her 'illet es-selâmu 'aleyk
Ezelden eyledi Hakk cümle kâinâta seni
Veliyy-i ni'met-i bî-minnet es-selâmu 'aleyk
Mey-i firâk-ı visâlinle mestim it huşyâr
Nedîm-i bezm-geh-i hazret es-selâmu 'aleyk
Hezâr-ı midhatinem gülsitân-ı 'aşkında
Gül-i ter-i çemen-i 'izzet es-selâmu 'aleyk
Kerem-verâ senin Allah olunca vassâfın
İder mi na'tına dil cür'et es-selâmu 'aleyk
Gubâr-ı pâyına kasdım bir 'arz-ı hâl ancak
Olur ise nazar-ı rağbet es-selâmu 'aleyk
Kemîne bendeni kıl âsitânına dâhil
Disin fakîre gelüp devlet es-selâmu 'aleyk
Sürüp yüzüm yere ferdâ diyem huzûrunda
Günahkâra gerek şefkat es-selâmu 'aleyk
Ne denli mücrim isem ümmetim amân amân
Revâ mı nâsa olam 'ibret es-selâmu 'aleyk
Şeref garîbi de yâd it dem-i şefâ'atde
Mu'în ü dâd-res-i ümmet es-selâmu 'aleyk
Şeref Hanım