Eyâ Sultânı Kevneynin Sözün Cümle Dekâyıkdır
7 Aralık 2022 tarihinde yayınlanmıştır.
NA'T-I ŞERÎF
Eyâ sultânı kevneynin sözün cümle dekâyıkdır
Letâifdir garâibdir 'acâibdir hakâyıkdır
Fesâhatde belâgatde me'ârifde merâtibde
Nebîlerden seni kimdir dimez a'lâ vü fâikdir
Senin bir vech ile zât-ı şerîfin zâhir oldu kim
Hudâ dimekden özgesi ne dinse sana lâyıkdır
Cihânda la'l ü yâkûtun adı gerçi ki sâmitdir
Senin la'lin suhen-gûdur dilin yâkût-ı nâtıkdır
Boyun serv-i hırâmândır semen-sâ kâkülün sünbül
Hatın mânend-i reyhândır ruhün misl-i şakâyıkdır
Zamîrin mihr-i rahşândır cebînindir meh-i tâbân
Külâlendir şeb-i yeldâ yanağın subh-ı sâdıkdır
Eyâ ma'şûk-ı Rahmânî ki farz-ı 'ayn imiş 'aşkın
Sana 'âşık olan kimse hemân Allah'a 'âşıkdır
İnüp gökden yire 'Îsâ n'ola olursa şâkirdin
Lebin ihyâ-yı mevtâda iğen üstâd-ı hâzıkdır
Senin şîrîn dudağına rateb dinse 'aceb midir
Bu nahlistân-ı 'âlemde ki boyun nahl-i bâsıkdır
Hakk'ın ism-i şerîfinden güzîn ismin ki müştâkdır
Mübârek adın Allah'ın latîf adına lâhikdir
Eğerçi da'vetin kamu nebîlerden eyâ dâ'î
Olupdur sûretâ sonra velî ma'nâda sâbıkdır
Beyân itse me'ânîyi bedî’-i mantıkın n'ola
Kelâm-ı hikmet-âmîzin mesâbîh ü meşârıkdur
Sabâ benzer ki gülzâr-ı diyârından güzer kılmış
Serâser uğrayan yerler gülistân u hadâikdır
Ebû Bekr u 'Ömer 'Osmân 'Alî kim çâr-yârındır
Seni her kim sever cândan bularınla muvâfıkdır
'Aceb mi medh-i hulkundan olursa Rûşenî 'âciz
Çü mâdih hulk-ı nîgûnu eyâ memdûh Hâlık'dır
Ne devletli se'âdetli ne 'izzetlidir ol kimse
Seninle rûz-ı mahşerde musâhibdir mu'ânikdir
Şefî'i her güneh-kârın çü ey şâh-ı kerem sensin
Gelüpdür Rûşenî dahi kapuna 'abd-i âbıkdır
Senin bir 'âşıkındır ol dil ü cândan eyâ server
Gözü yaşı yüzü rengi anın 'aşkına tanıkdır
Dede Ömer Rûşenî
Kuddise Sırruh