MuzafferOzak.com (Türkçe)

NUTK-İ ŞERÎF

Eyledim Yâ Rab senin hamdinle buna ibtidâ

Bilmeyince tâ senânı kimse bulmaz çün bekâ

Tâ tecellî kılmadan mir`ât-ı dil pes tîredir

Sıklet-i tenden rehâ ver bize lutf it yâ Hudâ

Cümlesi san irişir ayrı kalmaz zerre çün

Hamd iderem işbu sırra cân u dilden hâliyâ

Hâr-zâr-ı 'âleme meyl itmesin nefsin harı

Dâr-ı 'ukbâya sefer kıl k'oldurur derde devâ

Zerreni mahveyle tâ kim olmayasın pes zelîl

Rağbet it ihlâsa gâyet koma dilde hiç riyâ

Zehr-i dünya pes nedir bilmek dilersen sîm ü zer

Sa'y edüp çıkar gönülden hubbunu gel sâlikâ

Şeşder-i 'âlemde bir pul koma sa'y it rûz u şeb

Sâdıkâne Hakk yolunda gel çalış bulup safâ

Zâyi' olmaz Hakk yolunda cân viren itmez zarar

Tâir-i kuds oldu cân viren bu yolda tâlibâ

Zâhir ü bâtın çalış Hakk'a ir ko zulmeti

'Ayn-ı 'ibretle nazar kıl cümle şeye 'ârifâ

Gayret it virme gönülde yol sakın hiç gayrıya

Fâtih-i nefs ol dilersen bula varlığın fenâ

Kâf-ı istiğnâda ol Ankâ-sıfât var aç kanat

Geç kanâ'at mülküne sultân olup olma gedâ

Lücce-i 'ummân-ı 'aşka dal çıkar dürr ile la'l

Merd-i 'aşk ol Yâr'e var bin cân ile ol mübtelâ

N'oldun ey dil âh idersin sendedir çün her ne var

Vâdî-i hayretde kalma Yâr'e irgil olma vâ

Hep bu varlığın Sezâyî 'aşk ile idüp hebâ

Yokluğa irişmeğe di "rabbenâ yessirlenâ"

Hasan Sezâyî

Kuddise Sırruh

Eyledim Yâ Rab Senin Hamdinle Buna İbtidâ