Eyleriz Merkez-i Tevhîdde Devrân İle Raks
15 Haziran 2024 tarihinde yayınlanmıştır.
NUTK-İ ŞERÎF
Eyleriz merkez-i tevhîdde devrân ile raks
Tâif-i Ka'be ider sa'y ile cevlân ile raks
Gezerem serde hevâ dilde hayâl-i dildâr
San hevâ üzre ider taht-ı Süleymân ile raks
Mazhar-ı vahdet-i Hakk'dır ki cihân 'aşka gelüp
Devr idüp 'arş ider ferş-i şitâbân ile raks
Şem'-i dîdârına pervâne gibi mihr ider
Bedevî topu olup ahter-i tâbân ile raks
Gördü Hakk vechini her vech ile bir Mevlânâ
Pây-i gül-mîh-i semâ' eyledi vicdân ile raks
Çaldı çâlpâre-i mihr ü mehi rakkâs-ı felek
Cûylar coşdu hevâdan ider 'ummân ile raks
Sanki çıkdı yine Mansûr-ı ene'l-Hakk dâra
Dil-i ser-geşte ider zülf-i perîşân ile raks
Yâd idüp la'l-i lebin nûş-i müdâm itdikçe
Çeşm-i giryânım ider eşk-i gül-efşân ile raks
Meclis-i dilde nevâ-sâz olıcak mutrib-i 'aşk
Şem'-veş eyledi sâlûs-i şem'idân ile raks
Çekilir 'âlem-i 'ulvîye zarûrî ey Şems
İderek zerre gibi cezbe-i Rahmân ile raks
Osman Şems Efendi
Kuddise Sırruh