Ezân-ı Muhammedî Nasıl Vaz Olundu?
20 Şubat 2020 tarihinde yayınlanmıştır.
Çü kuvvet tutdu şer' İslâm açıldı 'âleme a'lâm
Namâza istedi i'lâm ki nice edeler bürhân
Kimi der çan çalın nâkûs kimi der kâme-i câmûs
Dediler kim gerek nâmûs çü nesh oldu kamu edyân
Resûlullah işitd'anı pes oldu muntazır cânı
Kim ere vahy-i rabbânî nedir diye ana Kur`ân
Erişdi meclise nâgâh ki Zeyd'in oğlu Abdullah
Dedi ben görmüşem vallah ki beyne'n-nevmi ve'l-yakzân
Ki gökden bir melek indi inüben hâyıta kondu
Yüzünü kıbleye döndü ki tekbîr eyledi i'lân
Dedi pes dört kez ol Allahu ekber
Ezânın dedi elfâzın mükerrer
Birazcık durdu geri okudu ol
İki kez sonra kad kâmet dedi ol
Ömer dedi ki gördüm ben de el-hak
Anın hakkı ki ba's etdi seni Hakk
Nebî pes Cebrâil'e sordu anı
Ki kim okuya mescidde ezânı
Dedi Cebrâil işit yâ Muhammed
Ezânı okusun şol 'abd-i esved
Kim anun savtı a'lâdır muhakkak
Müezzinlerden anı yeğ sever Hakk
Feriştehler anı meşhûd ederler
Ki lâyıkdır ezânı anı derler
Bilâl'e pes ezânı kıldı i'lâm
Ki tâ ede terakkî rükn-i İslâm
Buyurdu mescidin sathına çıkdı
Ezân okudu kim cânları yakdı
Ezân-ı zuhr idi kim ön verildi
Salât-ı hams için gülbang vuruldu
İşitdi çün anı ehl-i şakâvet
Bu bid'atdir deyüp etdi 'adâvet
Hemân dem vahy-i sübhânî erişdi
Hemân dem lutf-i rabbânî erişdi
Ve men ahsenü kavlen mimmen de'â ilallahi ve 'amile sâliha
Bu âyet geldi Allah'dan Resûl'e
Ki kimin sözü andan ahsen ola
Kim Allah'a kulunu da'vet ede
Amel kıla ve doğru yola gide
Dedi Keşşâf bu âyetde bil anın
Delîl vardır sübûtuna ezânın
Mücerred düş ile bilinmedi ol
Delîl-i nass ile hem oldu medlûl
Yazıcıoğlu Mehmed Efendi
Kuddise Sırruh