Ezelî Bu Aşkı Ben Bu Mülke Sürüp Geldim
25 Eylül 2021 tarihinde yayınlanmıştır.
NUTK-İ ŞERÎF
Ezelî bu 'aşkı ben bu mülke sürüp geldim
Bir idim anda şeksiz uş yine bire geldim
Ol birin nûru bana göründü er yüzünden
Cân gözüyle ol nûru ben bunda sora geldim
Ol nûru göreliden unutdum kendözümü
Sanasın Mûsâ benem hâcete Tûr'a geldim
Tûr-ı münâcât bana durduğum yerde olur
Benem bugün Bâyezid uş gizli sırra geldim
Ezel benim ilimdir elest benim yolumdur
Ezel ile elesti ben bunda göre geldüm
Ben ezelden vâr idim ma'şûk ile yâr idim
Hakk beni viribidi 'âlemi göre geldim
Çün gökden yere yağdım yerden göğe çok ağdım
Âdem donun donandım devrânım süre geldim
Et ü deri büründüm geldim size göründüm
Adımı âdem kodum andan zuhûra geldim
'Aşk esritdi cânımı uş "Ene'l-Hakk" dedirir
Korku gitdi gönlümden Mansûr'am dâra geldim
'Aşkdan derdli olana dermânım vardır benim
'Aşk sayrısı olana erkândır sora geldim
Mecnûn kadehin aldım Leylâ gönlüne daldım
Çün Hakk'ı 'ıyân bildim andan sınıra geldim
Bundan böylesi bilgil pâdişah iklîmidir
Dört yanım dîdâr oldu gör ne hûb yere geldim
Bana bu 'aşk dolalı adım Yûnus olalı
'Iyân oldu pâdişah kulam şükrâne geldim
Yûnus Emre
Kuddise Sırruh