Fakîhler Ders-i Aşkı Mushaf-ı Ruhsârı Bilmezler
4 Mart 2022 tarihinde yayınlanmıştır.
NUTK-İ ŞERÎF
Fakîhler ders-i 'aşkı mushaf-ı ruhsârı bilmezler
Sefîhler kenz-i mahfî gevher-i esrârı bilmezler
Fünûn-ı 'aşkı ger zâhir-perestler bilmez 'ayb olmaz
Harîdârân-ı har-mühre dürr-i şehvârı bilmezler
Katı ma'zûrdur müştâk-ı cennet hem-çü zâhid çün
Bilürler dârı ahmaklar velî diyârı bilmezler
Severler bir bölük yem-hâr isterler 'alef-zârı
Şikem kaydın çekenler neş'e-i dîdârı bilmezler
Habîbân anlamaz ağyârı bilmez gayr-ı dildârı
Bilenler yârı tahkîkâne gayr-i yârı bilmezler
Kadeh-hârân-ı sevdâ mest-i ma'nâ anlamaz âyîn
Taleb-kârân-ı bî-mezheb dîn ü dindârı bilmezler
Değil vâkıf özünden bî-haberdir câm-ı mahviyyet
Çekenler mest-i lâ-ya'kıl olanlar vârı bilmezler
Nazar kılmaz talebkârân bakmaz sünbülistâna
Esîr-i turra-i tarrârlar şeh-mârı bilmezler
Gezer Mîr Nigârî lâubâlî nâmdan geçmiş
Cünûn-ı dîde-i Leylâ olanlar 'ârı bilmezler
Seyyid Hamza Nigârî
Kuddise Sırruh