Farkı Var Yokdur
9 Şubat 2025 tarihinde yayınlanmıştır.
NUTK-İ ŞERÎF
Bu gülzâr-ı fenânın kim bekâdan farkı var yokdur
Fezâ-yı mahşer-i dehşet-nümâdan farkı var yokdur
Göründi nûr-ı vech-i Kibriyâ mir`ât-ı vechinden
Habîb-i Kibriyâ'nın Kibriyâ'dan farkı var yokdur
Zevât-ı hams olup zîr-i 'abâda birleşenlerden
Resûl'ün çâr ashâb-ı 'abâdan farkı var yokdur
Nübüvvetle velâyet birbirinde bâtın olmuşdur
Anınçün evliyânın enbiyâdan farkı var yokdur
Müsâvîdir e'âlî vü esâfil ahz u i'tâda
Gedânın şâhdan arzın semâdan farkı var yokdur
Bütün Behlûl-meşreb câzibe-dârân-ı tevhîdin
Nigâhında gamın zevk u safâdan farkı var yokdur
Temeyyüz kesb ider her şey hem itmez vâhidiyyetde
Ki isrâfın sefâhetle sehâdan farkı var yokdur
Görünmezlikde dil-çâk eylemekde ol kemân kaşın
Nigâhı tîrinin tîr-i kazâdan farkı var yokdur
Benimçün Mûsâ-yı mu'ciz-beyân dinse münâsibdir
'Asâ-yı hâmemin çün ejdehâdan farkı var yokdur
Dimezler vâsılân ey Şems olup hâmûş-ı hayretde
Sıfât-ı pâkinin zât-ı Hudâ'dan farkı var yokdur
Osman Şems Efendi
Kuddise Sırruh