Fâtih Sultan Mehmed Hân'a Medhiyye
23 Şubat 2022 tarihinde yayınlanmıştır.
KASÎDE
Minnet İlâh'a kim girü ol şâh-ı kâm-yâb
Tahtına irişüp didi ana baht-ı kâm-yâb
Feth ü zaferle irişüben dâr-ı mülkine
Kıldı 'adû rikâbını kılıcına kırâb
Ma'mûr kıldı memleketi cümle 'adl
Giderdi zulmü komadı bir yer ki ola harâb
Olmuş-durur sa'âdet-i devlet ana nasîb
Şöyle ki oldu lutf ile 'adl ü sehâ nisâb
Sultân-ı tâc-bahş Mehemmed şeh-i mülûk
Kim yüz sürer yoluna anın mâh u âfitâb
İder du'â vü medh ana mecmû'-ı hâss u 'âmm
Kılar senâ vü hamd ana yek-pâre şeyh ü şâb
Her-geh ki 'azme hazm ide düşmenlere ana
Bâd-ı sebük-'inândır u kûh-ı girân rikâb
Okudur ol kazâ ki kaderlendi çarhdan
Kılıcı sâ'ikadır u sügüsüdür şehâb
Her kanda kim anın eli feyzi 'atâ ide
Düşer hayâdan eriyüben yere sehâb
Esrâr-ı çarh gün bigi rûşen-durur ana
Lâbüd ne fikr itse hatâsız olur savâb
'Âlem içinde her ne ki var münkalib olur
Minnet Hakk'a ki yokdur anın tahtına inkılâb
Hulk-i şemâmesi gülün irdi meşâmına
Ol şermden-durur ki eriyüben olur gül-âb
Her yana döner ise n'ola hasm tâsadan
Sayru olana bî-gümân irişür ıztırâb
Ger Rüstem ise ol ki sana olmaya mutî'
Kılıcın ana serzeniş ile ider 'itâb
Yüzün safâsını görüben gül hayâdan uş
Yeşil harîr la'l yüzüne ider nikâb
Tâ mihr ü mâh kapuna yüz tutdu ser-te-ser
Kim ol cemî'-i 'âleme merci'dir ü me'âb
Söz nicesi irişdire medhine Ahmedî
Kim şem' bigi eritdi anı sûz-ı igtirâb
Kankı şarâba vardısa sîr-âb olam deyü
Oldu serâb tâli' ü bahtında anın şarâb
Her yana vardı bulmadı kimseden kerem
İtdi girü eşiğine devlet bigi iyâb
Senin eşiğine süre ihlâs ile yüzün
Her kim diler ki devlet ü baht ide iktisâb
Niçe ki ola çarh-ı felekde medâr u kutb
Olsun sipihr-i mihr senin dergehin-mesâb
Kılsın yolunu düşmeninin hattıyla hatâ
Savbını dost fikretinin eylesin savâb
'Azmine kanda kim ola olsun delîl feth
Fikrinle bikr gayb önünde olmasın hicâb
Desin felekde sana güneş sâhibü'l-livâ
Olsun kamer dilinde adın mâlikü'r-rikâb
Ahmedî