Fazl ü İhsânını Tamâm Ediver

1 Ocak 2020 tarihinde yayınlanmıştır.

MÜNÂCÂT

Fazl ü ihsânını tamâm ediver

Meded eyle meded ilâhî meded

İki 'âlemde ber-devâm ediver

Meded eyle meded ilâhî meded

Kulluğundur Efendi 'izzetimiz

Hizmet etmekdedir se'âdetimiz

Sana lâyık kanı 'ibâdetimiz

Meded eyle meded ilâhî meded

Kereminden bizi edüp îcâd

Mahz-ı fazlınla verdin isti'dâd

Eyledin çünki lutfuna mu'tâd

Meded eyle meded ilâhî meded

Nice bir derd ile hazîn olalım

Nice bir hem-dem-i enîn olalım

Fazl ü ihsânına karîn olalım

Meded eyle meded ilâhî meded

Bir avuç hâki eyledin insân

Kudretinle zuhûra geldi cihân

Zu'afâyı esirge ey Rahmân

Meded eyle meded ilâhî meded

Ey kamu hâle 'âlim ü dânâ

Lutfun ile olur fenâ vü bekâ

Bir efendi dahi yok ey Mevlâ

Meded eyle meded ilâhî meded

Nârı etdin Halîl'ine gülizâr

Dâğ ü taş eyledi su üzre karâr

Kıl 'inâyet Hüdâyî'ye her bâr

Meded eyle meded ilâhî meded

Azîz Mahmûd Hüdâyî

Kaddeseallahu Sırrahu'l-Âlî