MuzafferOzak.com (Türkçe)

NUTK-İ ŞERÎF

Fenâya meyl edüp kalmaz senin 'âşıkların cânâ

Bekâya dahi aldanmaz senin 'âşıkların cânâ

Bu dünyânın vefâsından kamu cevr ü cefâsından

Geçer nefsi hevâsından senin 'âşıkların cânâ

Cihânın nakşına bakmaz gönül verüp ana akmaz

Özünü odlara yakmaz senin 'âşıkların cânâ

Gönül vermez denî dehre tahammül eyler her kahra

Hakîkatde bulur behre senin 'âşıkların cânâ

Sivâ hubbunu terk eyler ezel 'ahdini berk eyler

Kamu maksûdu terk eyler senin 'âşıkların cânâ

Tutar bir kâmilin elin zikir öğretir o dilin

Yanılmaz bir nefes yolun senin 'âşıkların cânâ

Ezel Hakk izini izler müdâm rızâsını gözler

Dün ü gün vaslını özler senin 'âşıkların cânâ

Gönül yıkmağa kasd etmez bu a'mâlar gibi gitmez

Megesle mûru incitmez senin 'âşıkların cânâ

Öper destini kim döğse du'â eyler ana söğse

Gurûr etmez biri öğse senin 'âşıkların cânâ

Bilir esrârını cânın duyar remzini cânânın

Erer aslına her kânın senin 'âşıkların cânâ

Olur ez cân u dil 'âşık olur yolunda hem sâdık

Olur elbet sana lâyık senin 'âşıkların cânâ

Bu Bedrî kemterin 'uşşâk visâline müdâm müştâk

Sana ermek diler ancak senin 'âşıkların cânâ

Mahmûd Bedreddîn Efendi

Kuddise Sırruh

Fenâya Meyl Edüp Kalmaz Senin Âşıkların Cânâ