Fuâdı Kâinâtın Belde-i Mu'ciz-nüvâdır Bu
19 Ekim 2021 tarihinde yayınlanmıştır.
NA'T-I ŞERÎF
Fuâdı kâinâtın belde-i mu'ciz-nüvâdır bu
Semâ-paye harem-gâh-ı Resûl-i Müctebâ'dır bu
Harîm-i 'arz-ı cennet ravza-i Hayrü'l-Verâ'dır bu
Sakın terk-i edebden kûy-i Mahbûb-i Hudâ'dır bu
Nazargâh-ı ilâhîdir Makâm-ı Mustafâ'dır bu
Bu dergâh-ı mu'allâya tevessül eyleyen sâil
Bulur her derdine dermân olur maksûduna nâil
Esâtin-i hikem cümle bu hükme oldular kâil
Bu hâkin pertevinden oldu deycûr-i 'adem zâil
'Amâdan açdı mevcûdât dü çesmin tûtiyâdır bu
'Uyûn-ârâ-yı 'âlem tûtiyâ na'leyn-i hâkidir
Bu hadrâ kubbede mahfûz o nûrun cism-i pâkidir
Bütün envâr-i 'âlem 'aks-i nûr-i tâb-nâkidir
Felekde mâh-ı nev Bâbu's-Selâm'ın sîne-çâkidir
Onun kandîlidir hûr matla'-i nûr u ziyâdır bu
Müraccahdır bu hâkin her gubârı kadr u kıymetde
Cilâ-bahş-ı 'uyûn olmakda iksîre meziyyetde
Bu cây-ı dil-küşânın bir nazîri yok fazîletde
Habîb-i Kibriyâ'nın hâb-gâhıdır hakîkatde
Tefevvuk-gerde-i 'arş-ı Cenâb-ı Kibriyâ'dır bu
Ziyâsı pertev-efşândır bu hâkin mihr ile mâhe
Eder 'âşıklann da'vet serây-i "lî me'allah"e
Yüzün sür sen de ey Hazmî bu dergâh-ı felek-câhe
Mürâât-ı edeb şartıyla gir Nâbî bu dergâhe
Metâf-ı kudsiyândır bûse-gâh-ı enbiyâdır bu
Şâir Nâbî'nin meşhûr na'tı üzerine Tarîk-i Uşşâkiyye meşâyihinden Hazmi Efendi Hazretlerinin tahmîsidir.
NAĞME-İ AŞK