Geç Günâhımdan Gafûrâ Bakma Bu İsyânıma

6 Nisan 2020 tarihinde yayınlanmıştır.

MÜNÂCÂT

Geç günâhımdan Gafûrâ bakma bu 'isyânıma

İ'tirâf edüb suçumu gelmişem Rahmân'ıma

Zenbimi yazdırma lutf et defter-i dîvânıma

Dûzahın ahvâlini gösterme cism ü cânıma

Destgîrim ol eriş feryâdıma efgânıma

Tîğ-i hicrin bağrımı deldi revân etdi demi

Bilmez oldum hayretimden gündüzümü gecemi

Yüreğimin yarasına sar kerem kıl merhemi

Derdliyim rahm eyle sen ey râhimînin erhami

Senden özge kimsenin yetmez gücü dermanıma

Pes tefekkür eyledim hîç benden alçak kimse yok

Zenbimi kıldım tefahhus çün kevâkibden de çok

Bî-nihâyet eyledim dünyâda 'isyân u fusûk

Halka çok zulm eyledim hem bende var bî-had hukuk

Ne yüzüm var ki edeyim 'arz-ı hâl Sultân'ıma

Etdiğim cürm ü hatâyı etmediler ins ü cân

İsm-i Settâr'ınla anı eyle yâ Rabbi nihân

Görmesin bir zerresini 'ayn-ı halk-ı dü cihân

Kavm u yârânımla 'afv et cümlemizi el-amân

Vaslını eyle müyesser bana hem ihvânıma

Etdi Kuddûsî tevessül çün habîbinle sana

Bizi bağışla cemî'an ey Hudâ lutf et ana

Eyledin sen bize anı dü cihânda pîşüvâ

Hem bize dedin ki edin ana sizler iktidâ

Ki eresiz anın ile siz benim ihsânıma

Ahmed Kuddûsî
Kuddise Sırruh