Gel Berü Ey Mürşid-i Râh İsteyen
7 Kasım 2023 tarihinde yayınlanmıştır.
NASÎHAT
Gel berü ey mürşid-i râh isteyen
Bî-riyâ bî-rayb Allah isteyen
Key sakın sen çokdur ashâb-ı dalâl
Ekser akvâli buların kıyl ü kâl
Kisvet ü tesbîh ü misvâk ü sakal
Sûret itmiş san'at-i mekr ü hiyel
Hırka ile zâhirin telbîs ider
Fi'l ider hâşâ anı İblîs ider
Halk ilen mahlût Hakk'dandır ba'îd
Kim ana olmaz refîk oldur sa'îd
Gösterir zâhirde ol zühd ü fenâ
Kalbi pür hıkd ü hased 'ucb ü riyâ
Ehl-i 'ırz u sûretâ ehl-i vakâr
Dîn ü 'ukbâ milkin etmiş târümâr
Der muvahhidem velî mülhid-dürür
Bilmeyen hâlin sanır mürşid-dürür
Ma'rifet dürcin açup dürler saçar
İstimâ' itse sözün Şeytân kaçar
Kendü misli bir niçe ehl-i hevâ
Cem' olup katında ider medh u senâ
Ol muzahref sözlerin tasdîk ider
Belki 'akl ü nakl ilen tahkîk eder
Kendi ashâbı dalâlet mazharı
Her birisi oldu Şeytân mefharı
Cümlesi azgın-durur Şeytân'dan
Vay ana fazl irmeye Rahmân'dan
Rûz ü şeb Şeytân gelir hizmet içün
Her nefesde ana bin la'net içün
Kendü oldu çün re'îsü’l-mülhidîn
Gitdiler ka'r-ı cahîme ecma'în
Bana bir tenbîhdir lâzım olan
Assı olmaz son nefes nâdim olan
Gâfil olma hâzır ol ey tâlibûn
Câhil olma 'âkıl ol ey sâlikûn
Rehber olsa sana ger 'avn-i Hudâ
Sevk ider bâb-i ilâha bî-cüdâ
Feth olup bâb-ı tarîk-ı Mustafâ
Keşf olur sırr-i Resûl-i Mürtezâ
'Âkil oldur hisse aldı kıssadan
Câhil oldur hâlî olmaz gussadan
Ahmed Efendi
Kuddise Sırruh