Gel Ey Ashâb-ı Mâtem Zâre Kim Yevm-i Belâdır Bu
7 Ekim 2016 tarihinde yayınlanmıştır.
MERSİYE
Gel ey ashâb-ı mâtem zâre kim yevm-i belâdır bu
Figân eyyâmıdır rûz-i Şehîd-i Kerbelâ'dır bu
Ciğergâh-ı musâbe dâğ-ı firkat bas yakup sînen
Kebâb et cismini bezm-i gamm-ı Ehl-i Kisâ'dır bu
Demâdem yâd edip ahvâl-i nûr-i çeşm-i Zehrâ'yı
Yezîd'e la'net etmek mü'mine farz-ı Hudâ'dır bu
Enîn ü âh ile ey dil tezelzül eyle gerdûnu
Ki bunca cevr ü mihnet Şâh Huseyn'e ne revâdır bu
Şefâ'athâh-ı mahşer olmuş iken ehl-i ısyâna
Ne ısyân etdi ol şâha Yezîd-i pür-cefâdır bu
Nice kân etmesin ehl-i semâ dâmânını çarhın
Bugün hâke düşen guşvâre-i arş-ı ulâdır bu
Çözülmüş sünbül-i geysûleri bâd-ı mesâible
Gubâr-âlûde olmuş mehcebîn-i "hel etâ"dır bu
Boyanmış gül gibi şâhın cemal-i pâki al kana
O gerden kim şikeste bûsegâh-ı enbiyâdır bu
Görüp bî-ser ü ten Şehzâde'yi çün Hazret-i Zeyneb
Gelüp feryâda ol dem vâh Hüseyn-i Müctebâ'dır bu
O nâzik cisme mehd olmuş iken âgûş-i Peygamber
Yatur hâk üzre uryân nakd-i pâk-i Mustafâ'dır bu
Füyûz-i şer' için Hak râhına kurbân eden cânın
Sürûr-i sîne-i pâk-i Aliyye'l Mürtezâ'dır bu
Akıt gözden sirişk-i hûnu feryâd eyle ey Hilmî
Bugün aşr-ı muharrem mâtem-i Âl-i Abâ'dır bu
NAĞME-İ AŞK