Gel Ey Da'vâ-yı İrşâd Eyleyenler
13 Temmuz 2021 tarihinde yayınlanmıştır.
NUTK-İ ŞERÎF
Gel ey da'vâ-yı irşâd eyleyenler
Özüne şeyhliği âd eyleyenler
Gerekdir şeyh olan kişiye elbet
Yirmi fi'l ile ola mukayyed
Birisi i'tikâd olmak gerekdir
Hakk'ı ikrâr ile bulmak gerekdir
Cemî' ehl-i sünnet ve'l-cemâ'at
Tarîki üzre olmakdır se'âdet
İkinci 'ilm-i bâtın anlamakdır
Denilen vâkı'ayı dinlemekdir
Sakınup etmeye âfâkî ta'bîr
Meşâyih etmişdir anı takrîr
Üçüncü 'akl-ı kâmil ola gâyet
Ede dervîşlere bir hoş nasîhat
Sahâvetdir anın dördüncü hâli
Vere dervîşlere vâr ise mâli
Beşincisi şecî' olmak gerekdir
Bu cümleden şecâ'at yeğrekdir
Cihân halkı eğer cem' olsa cümle
Gelüp üstüne hem de etse hamle
Sığıup Hazret-i Hakk'a derûnî
Cihânda olmaya kimse zebûnu
Anın altıncısı olmaya şehvet
Ki şehvetden gelir cümle nedâmet
Havâtûn tâifesinden key sakına
Dilerse uğramaya ta'n okuna
Yedinci etmeye dünyâya ülfet
Meğer kim ola gâyetde zarûret
Mürîdin mâline bakmaya hergiz
Ede çift ü zirâ'atden de perhiz
Sekizinci ede mürîde şefkat
Ana göstermeye hizmetde zahmet
Dokuzuncu halÎm olmak gerekdir
Mürîdine selîm olmak gerekdir
Onuncu 'afv ede dervîşlerinden
Günah sâdır olursa işlerinden
Gerekdir on birinci husn-i hılkdan
Ki halk ile mürîdler ola hulfdan
On ikinci mürîdin ihtiyâcı
Vâr iken bir işe anla du'âcı
Ol işi kendine çekme hazer kıl
Bu makûle olanlardan güzer kıl
On üçüncü keremdir gâfil olma
Mürîdine kerem kıl bahîl olma
Velâyetden ne kim vâr ise sende
Zuhûr etmek gerekdir senden anda
Tevekkül eyle on dördüncü hâlde
Tevekkül ehli olur kemâletde
Gerekdir on beşinci hâli teslîm
Rızâ-yı Hakk'a râzı ola dâim
Mürîdler münkir olsa etme sen gam
Mürîd olursa 'âlim olma hurrem
On altıncı rızâ vere kazâya
Ne mihnet gelse şükr ede Hudâ'ya
Gerekdir on yedinci vekârı
Ola durmakda oturmakda 'ârı
Sakıngıl yeyincek etme özünü
Ağırca söyle söylersen sözünü
Vefâ etmek gerekdir 'ahde dâim
Gerekdir ola ikrârında kâim
Gerekdir on sekizinci sükûnet
Ki ta'cîl etmeden gelir nedâmet
Anın sâbit-kademdir on dokuzu
Neye 'ahdetse döndürmeye yüzü
Yirmincisi heybet gerekdir anda
Mürîdler heybetinden olan bende
Cevâbın kim ki Seyyid Seyfî tutdu
Meşîhat hakkı oldu Hakk'a yetdi
Seyyid Nizâmoğlu Seyyid Seyfullah
Kuddise Sırruh