Gel Ey Nefs Esîri Olan Âdemî
18 Ekim 2021 tarihinde yayınlanmıştır.
NUTK-İ ŞERÎF
Gel ey nefs esîri olan âdemî
Becid sa'y-i 'aşk et geçirme demi
Olar kim bu dünyâda âzâd olur
Devâm üzre uhrâda olar şâd olur
Kuyûdât-i şehevât-i nefsin seni
Gözün aç idipdür çü bend-i kavî
Mukayyedsin ammâ değilsin habîr
Bul imdi idüp sa'yi bir destigîr
Ki i'tâk idüp ol seni ide hür
Mülevves iken olasın pâk dür
Ki ıtlâka irmeğe ola sebeb
Safâlar gelüp def' ola hep te'ab
Seni ol halâs ide tâ ez-kuyûd
Nüzûl itmiş iken kılasın su'ûd
Çü nefsin sıfâtı viripdür keder
Düriş gice gündüz özünden gider
Silüp nefsini eyle pâk ü latîf
Ki def' ola sıklet olasın hafîf
Sıfât-i kabîha virür sıkleti
Sıfât-i latîfe virür hıffeti
Yola gitse âdem çü hıffet gerek
Ana mümkin oldukça 'iffet gerek
Ki tahfîf-i esbâb ider 'âkılân
Çü tahmîl-i eskâl ider câhilân
Sefer hod mukarrer durup hâzır ol
Ki eskâli ref' it uzakdır çü yol
Eğer cehle gâlib ola 'akl-ı kes
O tahfîf-i esbâb ider her nefes
Eğer 'akla gâlib olursa cehil
Bulur her nefesde tezâ'uf sakil
Kalır yolda varmaz o kes menzile
Ki dünyâda aldandı ol mahmile
İrer menzile ehl-i tecrîd olan
Görür Hakk'ı her demde tevhîdi olan
Çü tevhîd ola pâk olur nefs ü dil
Müzekkâ musaffâ durur öyle bil
Zekâdan safâdan safân vâr ise
Dürüş çünki 'aklın sana yâr ise
Ki hâl eyle kendüne tevhîd-i hâs
Kamu kayd olandan bulasın halâs
Ahmed Efendi
Kuddise Sırruh