Gel Ey Tâlib Olan Visâl-i Nigâr
22 Ekim 2021 tarihinde yayınlanmıştır.
NASÎHAT
Gel ey tâlib olan visâl-i nigâr
Koma kadr-i zerre gönülde gubâr
İdersen musaffâ gönül ez-keder
Kılar ana Hakk günde yetmiş nazar
Cilâ eylesen kalbin âyînesin
Tecellâ-yı Hakk'a bil âyînesin
Olar kim kılar ref'-i gaflet zî-'ayn
Görür künh-i eşyâ olup Hakk'a 'ayn
O kim her nefes Hakk'a nâzır durur
Görür Hakk'ı her şeyde hâzır durur
Olar kim açık tutdu kalbin müdâm
İrer Hakk'dan anlara her dem selâm
O kim 'âdeti oldu savm-i visâl
Bu halk içre anlar durur ehl-i hâl
O kim 'âdeti oldu ihyâ-yi şeb
Mukarrer şühûd itdi bir şebde Rab
Olar kim kılarlar kıyâm-ı sene
İrer Kadr'e sen dahi terk it sine
Bilin her ki ihyâ iderse sinin
Olur kalbi anın kitâb-ı mübîn
Kimin 'âdeti olsa cû'-i seher
Olur Hakk huzûrunda ol her seher
Kılan gece gündüz sıyâm u kıyâm
Bulur kurbet-i Hakk'ı ol bi't-temâm
Bu tavr üzre her kim sülûk itdi râh
Olur müntehî ana bî-şek İlâh
Gel ey tâlib eyle özün imtihân
Ola açıla bâb-i sırr-ı nihân
Demek benden ammâ ki itmek senin
Delâlet benim yola gitmek senin
Ahmed Efendi
Kuddise Sırruh