Geliniz Hâlık'ı Zikr Eyleyelim
17 Şubat 2020 tarihinde yayınlanmıştır.
NUTK-İ ŞERÎF
Geliniz Hâlık'ı zikr eyleyelim
El-hamdü lillâh eş-sükrü lillâh
Lutf u ihsânına şükreyleyelim
El-hamdü lillâh eş-sükrü lillâh
O sultândır eden kulların irşâd
"Men lem yehdillâhu mâlehû min hâd"
Gönül kasrın ede lutf ile âbâd
El-hamdü lillâh eş-sükrü lillâh
Şu dem ki lutf ere dest-i kudretden
Dili îkâz eder nevm-i gafletden
Alır nûr-ı ziyâ şems-i vahdetden
El-hamdü lillâh eş-sükrü lillâh
Hakk gibi maksad-ı aksâ olur mu
Vuslat gibi zevk-i a'lâ olur mu
Böyle bir ni'met-i uzmâ olur mu
El-hamdü lillâh eş-sükrü lillâh
Hüdâyî kim bula esrâr-ı tevhîd
Olur ol bülbül-i gülzâr-ı tevhîd
Verir câna safâ envâr-ı tevhîd
El-hamdü lillâh eş-sükrü lillâh
Azîz Mahmûd Hüdâyî
Kuddise Sırruh