Girândır Çeşm-i Dilde Hâb-ı Gaflet Yâ Resûlallah
28 Ocak 2023 tarihinde yayınlanmıştır.
İSTİMDÂD
Girândır çeşm-i dilde hâb-ı gaflet yâ Resûlallah
Meğer bîdâr ide subh-ı hidâyet yâ Resûlallah
Derûnum şu'lezâr etdi serâser âteş-i 'ısyân
Meğer ki itfâ ide eşk-i nedâmet yâ Resûlallah
N'ola bâr-ı girân-ı ma'siyyet kaddim dü tâ etse
Getirmez hâsılı dağ olsa tâkat yâ Resûlallah
Ümîd oldur olam âzâd mahşer korkusundan ben
İdersen mazhar-ı 'ayn-ı 'inâyet yâ Resûlallah
Cihân nûr ile dolmuşdur serâser hükm-i şer'inle
Sana mahsûsdur mihr-i nübüvvet yâ Resûlallah
Mutî'-i bârigâh-i da'vetindir 'âlem ü âdem
Müsellem zâtına emr-i risâlet yâ Resûlallah
Metîn ü üstüvâr olsa 'aceb mi çâriyârındır
Çihâr erkân-ı eyvân-ı şerî'at yâ Resûlallah
Kabûl eyle meded reddinle mahrûm etme sultânım
Senin mahzûnunum sen eyle şefkat yâ Resûlallah
Benim de hâlime rahm eyle hengâm-ı şefâ'atde
'Usât-ı ümmete rûz-i kıyâmet yâ Resûlallah
Günahkârım günahkârım günahkârım Nazîm-âsâ
Şefâ'at kıl şefâ'at kıl şefâ'at yâ Resûlallah
Nazîm