Gönül Aşkınla Zâr-ı Mübtelâdır Yâ Resûlallah
16 Ocak 2023 tarihinde yayınlanmıştır.
İSTİMDÂD
Gönül 'aşkınla zâr-ı mübtelâdır yâ Resûlallah
Yolunda bâş ile cânım fedâdır yâ Resûlallah
Eğer reddeylemezsen dergeh-i 'arş-âsitânında
Kul olmak rütbe-i 'izz ü a'lâdır yâ Resûlallah
Olup bin cân ile teslîm-i derd-i mihnet-i 'aşkın
Süveydâ-yı dilim dâğ-ı rızâdır yâ Resûlallah
N'ola âsûde olsam sâye-i şehbâl-i 'aşkında
Ki düşmez herkese zıll-i hümâdır yâ Resûlallah
İşin altun eder yüzler süren dergâh-1 vâlâya
Gubâr-ı râh-ı kûyin kîmyâdır yâ Resûlallah
Olaldan haste-i 'aşkın hayât-ı câvidân buldu
Dil-i bîmârıma derdin devâdır yâ Resûlallah
Açar gül gibi kalbin artırır bîmârının 'ömrün
Gamın hem dilgüşâ hem cânfezâdır yâ Resûlallah
Demâdem nehr-i cârî-veş n'ola aksa firâkında
Gözüm yaşı tükenmez mâcerâdır yâ Resûlallah
Revâ pervâne gibi bezmgâh-ı kurbe yol bulsak
Ki nûr-i şem'-i zâtın rehnümâdır yâ Resûlallah
Sezâ her bir nazarda eylese iksîr-i manzûrun
Gözüm hâk-i derinle rûşenâdır yâ Resûlallah
'Aceb mi dem-be-dem âgaşte-i hûn-i ciğer olsa
Gönül bahr-ı gamınla âşinâdır yâ Resûlallah
Melâik kuhl-i çeşm-i cân ide bulsa gubârından
Ser-i kûyinde ol kim hâk-i pâdır ya Resûlallah
Derûn-i tîrede nûr-ı cemâlin eylesin işrâk
Ki mâh-ı tal'atin bedr-i dücâdır yâ Resûlallah
Melekler cân gözüne sürme eylerler gubârından
Ser-i kûyinde ol kim hâk-i pâdır yâ Resûlallah
Habîb-i Kibriyâ Mahbûb-i Hakk şem'-i hidâyetsin
Vücûd-i kâmilin nûr-ı Hudâ'dır yâ Resûlallah
Olurdum kâbil olsa nakd-i cân-ber-kef hırîdârı
Der-i 'aşkın senin kim bî-behâdır yâ Resûlallah
Şefîk-i gümrehânsın sen hevâ-yı 'aşka uydum ben
İşim şâm ü seher sehv ü hatâdır yâ Resûlallah
Tabîb-i hastegânsm şerbet-i lutfun dirîğ etme
Derin 'âsîlere dârü'ş-şifâdır yâ Resûlallah
Kerem kânı mürüvvet bahrisin lutf eyle ihsân et
Kulun gerçi 'atâna nâ-sezâdır yâ Resûlallah
Şeh-i her dü cihânsın eyle mir`ât-ı dilin manzûr
Nazîm-i derdmendin bir gedâdır yâ Resûlallah
Anı lutfunla şâd et âb-ı rûy-i çâriyârın'çün
Ki düşmüş hâk-i 'acze bî-nevâdır yâ Resûlallah
Nazîm