Gönül Lutf Eyle Gel Erken Bu Zevk İle Safâdan Geç
16 Eylül 2020 tarihinde yayınlanmıştır.
NUTK-İ ŞERÎF
Gönül lutf eyle gel erken bu zevk ile safâdan geç
Tecerrüd 'âlemin gözle fenâ ile bekâdan geç
"Eleysallahu bi kâfin" demişdir 'abdine Mevlâ
Bırak dünyâ vü ukbâyı cemî'-i mâsivâdan geç
Sana senden yakîn olan vücûda olagör vâsıl
Bulagör vahdet-i Zât'ı yürü âğ ü karâdan geç
Halâs olmak dilersen ger cemî' derd ü mihnetden
Şifâ bil derdini derde derûnunda devâdan geç
Eğer duymak diler isen Cenâb-ı Kibriyâ'dan sır
Makâm-ı sırda mahvolup bu kizb ile riyâdan geç
Zamîrin pâk edüp kaldır hicâb-ı kesreti dilden
Hüviyyet bahrine gark ol "hüm" ile "hümâ"dan geç
Hümâ-yı rûhuna şol dem erişe "irci'î" emri
İtâ'at eyle Bîçâre rızân ile yuvadan geç
Abdullah Bîçâre
Kuddise Sırruh