Gördüm Dolaşır Nâz İle Hûbân Arasında
31 Ağustos 2020 tarihinde yayınlanmıştır.
NUTK-İ ŞERÎF
Mânend-i kamer encüm-i tâbân arasında
Hâbîde-nigeh çeşm-i gazâlânı süzüldü
Bir fitne uyandı yine müjgân arasında
Bir nîm tebessümle eder mürdeler ihyâ
Sor âb-ı hayâtı leb ü dendân arasında
Ey şâne ara hâtır-ı 'uşşâkı bulursun
Dil-beste bütün zülf-i perîşân arasında
Bir ân idi gördüm yüzünü vech-i sebeb ne
"Ve'ş-şems" okuram âyet-i Kur'ân arasında
Bülbülleri mebhût ü gülü eyleme mehcûr
Ruhsârın açık gezme gülistân arasında
Setr etse ne mâni' ruh-ı tâbânını gîsû
Hak zâhir iken küfr ile imân arasında
Ser-rişte-i 'irfân olarak mebhas-ı zülfün
Sohbet uzadı dün gece yârân arasında
'Aşkınla senin olmayan âşüfte vü hayrân
Âdem mi sanır kendini insân arasında
Âdem ki henüz tîn idi 'ummân arasında
İsmin okudu Sûre-i Rahmân arasında
'Aşkınla bulup Nûh nice feyz-i necâtı
Keştîyi halâs eyledi tûfân arasında
Cibrîl ne bilsin ki Halîl ism-i celîlin
Yâd eyler idi âteş-i sûzân arasında
Ya'kûb'a getirdi haber-i Yûsuf'u nâgâh
'Aşkın eseri külbe-i ahzân arasında
Meftûn u harîdâr olarak hüsnüne Yûsuf
Mümtâz u 'azîz oldu o ihvân arasında
Dâvud'a safâ bahş ederek sıyt-ı bülendin
Zikreyler idi vasfını elhân arasında
İsminle münakkaşdı meğer mühr-i Süleymân
Hükmü yürüdü ins ile dîvân arasında
Mihrâb-ı dü ebrûna teveccüh Zekeriyyâ
Etmişdi ki nâm aldı şehîdân arasında
Ezkâr-ı salâtındı dil-i Yûnus'a mûnis
Ey bahr-i 'atâ zulmet-i 'ummân arasında
Ümmîd-i visâlinle edüp sabr u te'ennî
Eyyûb ferahnâk idi kirmân arasında
'Aşkın kelimâtı mı değil nüsha-i elvâh
Mûsâ ile bir sırr idi Sübhân arasında
Bir müjde-ber-i Hazret-i Rabb zâde-i Meryem
Teşrîfini eflâke sürûşân arasında
Ey Şâh-ı Rusül vasf-ı hümâyûnunu bizzât
Derc eyledi Hakk Hazret-i Furkân arasında
Sıddîk'in için etme bizi mahv u perîşân
Pâmâl-i gamız bir sürü düşmân arasında
Fârûk'una emr eyle bizi eyle tahlîs
Selletmiş idi seyfini tuğyân arasında
Râzı değil ahvâlimize meşreb-i Osmân
Şermendeleriz bir nice 'ısyân arasında
İmdâd hemân Hayder-i Kerrâr'ına kaldı
Yok melce'imiz bir dahi şüc'ân arasında
Bir çâre Hüseyn 'aşkına ümmet zedelendi
Pür kerb ü belâ kıldı yezîdân arasında
Ashâbın için âlin için eyle 'inâyet
Tâ kalmayalım ye's ile hırmân arasında
'Uşşâk der-i kûyuna gülşen idi yer yer
Yüzler sürerek yerde mugaylân arasında
Mahrûm-ı ziyâret ne revâ bunca müselmân
Eşvâk u tehassür dil ü vicdân arasında
'Isyân-ı firâvânımıza yoksa nihâyet
Bir şey mi 'aceb 'afv ile gufrân arasında
Remzî kulunu eyleme mahrûm-ı şefâ'at
Mağlûb-ı hevâ nefs ile şeytân arasında
Dergâhına şâyeste değil gerçi salâtım
Reddetme selâmât-ı büzürgân arasında
Bâkî Dede üstâd Emîrî gibi dahi
Kaldım bu iki şâ'ir-i zî-şân arasında
Mevzû'una hürmetle bu nazmım beğenilse
Tesbît ederim defter ü divân arasında
Ahmed Remzi Dede
Kuddise Sırruh
Kuddise Sırruh