Görenler Âfet-i Hüsnün Derûnundan Figân İster
19 Kasım 2021 tarihinde yayınlanmıştır.
NUTK-İ ŞERÎF
Görenler âfet-i hüsnün derûnundan figân ister
Tahammül etmeğe mehrû-yi bî-hemtâya cân ister
Visâl-i iltifât-ı hüsnüne müştâk olanlar hep
Ne ten ister ne cân ister ne hûr u ne cinân ister
Letâfet her hüsünde lâzım u mülzem gibi lâkin
Şerâr-ı câzib-i 'aşk olmağa bir başka ân ister
Mezâyâ-yı cemâlin vâsıfı hâmûş eder dâim
Görünce hüsnünü lâl olmayan nâtık dehân ister
Tenezzül eylemez her menzile ankâ gibi 'aşkın
Sadef mânendi sâf 'âşık dilinde âşiyân ister
Sütûr-i ders-i 'aşkı mekteb-i hüsnün eder ta'lîm
Anınçün mürg-i dil hüsnün gibi bir gülsitân ister
Ne gam açsa dil-i 'uşşâkda Sâmî gül gibi yâre
Sadâkatden gönülde şâhid-i 'aşka nişân ister
Şeyh Abdurrahmân Sâmî Saruhânî
Kaddesallahu Sırrahu'l-Âlî