Gülşen-i Kudse Dilâ Tûtî-i Gûyâsın Sen
14 Mart 2024 tarihinde yayınlanmıştır.
NUTK-İ ŞERÎF
Gülşen-i kudse dilâ tûtî-i gûyâsın sen
Bâğ-ı vahdetde dahi bülbül-i şeydâsın sen
Bezm-i 'âlemde seni sanma gedâsın sen
Cümleden kuvvet ü kudret ile a'lasın sen
Gâfil olma gözün aç cevher-i yektâsın sen
Ezelî şâhid ü meşhûd-i dilârâsın sen
Devr ile cümle nebâtât u me'âdîni hemân
İdüp itmâm-ı devr oldı vücûdun insân
Hubb-ı zâtıyla muhibdir sana cânâ cânân
Tut rızâ dâmenini sıdk ile elde her ân
Gâfil olma gözün aç cevher-i yektâsın sen
Ezelî şâhid ü meşhûd-i dilârâsın sen
Zâtını Hakk yed-i kudret ile tahmîr itdi
Rızkını 'ömrünü her hâlini takdîr itdi
Seni ol râh-ı hüdâda dahi tahyîr itdi
Nûr-ı fıtrîyle dahi kalbini tenvîr itdi
Gâfil olma gözün aç cevher-i yektâsın sen
Ezelî şâhid ü meşhûd-i dilârâsın sen
Fikr ile hılkatinin aslını bil icmâlâ
Vâr idüp zatını yokdan seni itdi ihyâ
Sana tahmîl-i emânet idüp ol Bârî Hudâ
Emr ü nehy ile 'amel eyleyegör subh u mesâ
Gâfil olma gözün aç cevher-i yektâsın sen
Ezelî şâhid ü meşhûd-i dilârâsın sen
Emr ü nehyini idüp Hazret-i Kur’ân beyân
Eyledi lutfu ile bize Habîb'i i'lân
İttibâ' ile geçir 'ömrünü hiç itme gümân
Seni mesrûr ider elbette Hudâ-yı Mennân
Gâfil olma gözün aç cevher-i yektâsın sen
Ezelî şâhid ü meşhûd-i dilârâsın sen
Lâ vü illâ ile zikr eyle selâmet bulasın
Sûrî vü ma'nî 'inâyetle sa'âdet bulasın
Kıl Habîb'e salâtı ki şefâ'at bulasın
İktidâ eyle Nazîr ana 'inayet bulasın
Gâfil olma gözün aç cevher-i yektâsın sen
Ezelî şâhid ü meşhûd-i dilârâsın sen
Nazîr İbrâhim Efendi
Kuddise Sırruh