MuzafferOzak.com (Türkçe)

NUTK-İ ŞERÎF

Haber virsin bize 'âlem cân u dil eydür illâ Hû

Nedendir gör bu suâlim cân u dil eydür illâ Hû

Ezel kısmet bazârında virildi câna Mevlâ'dan

Ne gökçek geldi bu fâlım cân u dil eydür illâ Hû

Karârı kalmadı cânın ledünnî 'ilminin zevkin

Duyaldan böyledir hâlim cân u dil eydür illâ Hû

Nişânım bî-nişân oldu mekânım bî-mekân oldu

Ne kaldı ceng ü cidâlim cân u dil eydür illâ Hû

'Aceblemen beni billah elimde ihtiyârım yok

Beşerden gitdi kemâlim cân u dil eydür illâ Hû

Cemâli bâğının verdi beni hayrân ider her dem

Unutdum gayrı eşgâlim cân u dil eydür illâ Hû

Okunan zikrin envârı gelir her dem olur ilhâm

Hemân oldur satam alam cân u dil eydür illâ Hû

Makâm-ı zühd ü takvânın cevâbın dinlemez sem'im

Ne sırdır işbu ef'âlim cân u dil eydür illâ Hû

Didi nefsim ki bu yanmak hüner değil gözün aç bak

Bana iğvâ ider zâlim cân u dil eydür illâ Hû

Gelir vuslat yeli her dem yürekde açılır yara

Bana ağyâr olur şâlim cân u dil eydür illâ Hû

Harâbât ehliyem varım fenâ-ender-fenâ oldu

Ne bilem var mı emsâlim cân u dil eydür illâ Hû

Bize mürşid-i kâmilden virildi ni'metin hâsı

Ne 'aşkdır sükker ü balım cân u dil eydür illâ Hû

Sinân Ümmî kanı kanda görenler bir haber virsin

Ne meyl-i mülk ne âmâlim cân u dil eydür illâ Hû

Elmalılı Sinân Ümmî

Kaddesallahu Sırrahu'l-Âlî

Haber Virsin Bize Âlem Cân u Dil Eydür İllâ Hû