Habîbâ Rütbe-i Şânın Bu Mahlûkda Muvakkardır
2 Nisan 2023 tarihinde yayınlanmıştır.
NA'T-I ŞERÎF
Habîbâ rütbe-i şânın bu mahlûkda muvakkardır
Cebînin meşrık-ı envâr-ı Hakk'dır nûr-ı ezherdir
Gürûh-i mürselîne muktedâsın kadrin azherdir
Cemâlin nûruna nisbet güneş bir nûr-ı bî-ferdir
Güneş sensin ki zerrâtın nebîlerle velilerdir
Dü çeşme cümle ebrâr hak râhın tûtiyâ eyler
Kim ol iksîr-i zü'l-hâss hakîkat bî-bahâ cevher
Melâik na't-ı "levlâk"in ederler her seher ezber
Sen ol sultân-ı iklîm-i risâletsin eyâ server
Kamu şehler kapunda bir gedâdan dahi kemterdir
Hakîkatde senin zâtındır ey şâh dürr-i bî-hemtâ
Pes ol dürre sadef olmuş bu 'âlem çün ki ser-tâ-pâ
Seni vasf eyleyüp Mevlâ dedi "kâbe kavseyni ev ednâ"
Kaddin bâğ-ı hüviyyet servi haddin bir gül-i ra'nâ
Yüzün şems-i münevverdir cebînin mâh-ı enverdir
Şefâ'at tahtgâhında se'âdetle oturmuşsun
"Le 'amrük" tâcını ey şâh ser-i 'ulyâna urmuşsun
Fezâ-yı 'afva mahşerde habîbâ hayme kurmuşsun
Yeter 'uşşâka müjde "men reânî" kim buyurmuşsun
Seni görmeklik ile Hakk'ı görmek bes berâberdir
Gülistân-ı nu'ûtuna vefâ çün feyz-mendindir
Olup cûyende-i lutfun derinde müstemendindir
Anı mahfûz fikr-i sivâdan zikr-i pendindir
Eyâ şâh-ı rusul rahm et Sezâyî derdmendindir
Kapun bekler kadîmî hizmetinde pîr-perverdir
Hasan Sezâyî
Kuddise Sırruh