Hakîkat İlmine Vâsıl Olanlar Kâli Neylerler
9 Şubat 2022 tarihinde yayınlanmıştır.
NUTK-İ ŞERÎF
Hakîkat 'ilmine vâsıl olanlar kâli neylerler
O kânın gevher-i pâkin bulanlar mâlı neylerler
Bugün şol cennet-i 'âcildedir zevk-i visâli
Ey dil bu nakd-i hâzırı terk edüp istikbâli neylerler
Gönül peymânesi bir bâde-i 'aşk-ı ilâhîdir
Anı nûş eyleyenler câm-ı mâlâmâlı neylerler
Mükâşifler erer ancak beğim tafsîline 'ilmin
O tafsîli bilen erbâb-ı dil icmâli neylerler
Murâd-ı 'ârif-i billah olanlar Hakk cemâlidir
Onlar elvânı bu eşkâli bu emsâli neylerler
Ölüp ölmezden evvel Hakk cemâlin görmeğe sa'y et
Elinde Hakkı fırsat vâr iken ihmâli neylerler
İsmâil Hakkı Bursevî
Kuddise Sırruh